Aqolli: Qarabağı ÇL-in qrup mərhələsində görməyi arzulayan fanatları yaxşı anlayıram

"Qarabağ"ın albaniyalı müdafiəçisi Ansi Aqollinin azerisport.az saytına müsahibəsi

- "Qarabağ"la müqavilənizi yenilədiz. Öncə bununla bağlı fikirlərinizi bilmək istərdik...
- Özümü "Qarabağ"da çox əla hiss edirəm. Yeni müqavilə bir illik nəzərdə tutulub.

- Komandanızdan Çempionlar Liqasında nə gözləyirsiz?
- Orada zəif rəqib anlayışı yoxdu. Ona görə ki, rəqiblərimizin hər biri öz ölkəsinin ən güclüsüdü. Çox çətin olacaq.

- ÇL-in qrup mərhələsinə düşməyiniz nə dərəcədə inandırıcıdı?
- Bu haqda danışmaq hələ tezdi. Hələ ilk rəqibimizin kim olacağına baxmaq lazımdı. Allah eləsin ki, növbəti mərhələyə yüksələ bilək. Amma biz hazırda yalnız start oyunlarına köklənməliyik.

- Hansı ölkə klublarını özünüz üçün keçiləsi hesab edirsiz?
- Dediyim kimi, indi ÇL-də asan rəqib yoxdu. Hər bir klubun öz oyun üslubu var, digərlərindən fərqlənir. Hansısa komanda adına görə zəif görünə bilər. Amma meydanda hər şey tam fərqli olur. Ona görə də hər rəqibə ciddi yanaşmalıyıq. Ən azından ona görə ki, "Qarabağ" bu turnirdə mümkün qədər irəli getmək istəyir.

- Azərbaycanlı futbolsevərlər komandanızın ÇL-in və ya Avropa Liqasının qrup mərhələsinə düşəcəyinə inanırlar...
- Onların hamısını gözəl başa düşürəm. Bütün azarkeşlər həmişə komandalarının uğur əldə etməsini arzulayırlar. "Qarabağ"ın tərəfdarları da eyni şeyi istəyir. Bu, onların haqqıdı. Çox ümid edirəm ki, biz qrup mərhələsinə vəsiqə qazana biləcəyik. Biz özümüz də bunu, azarkeşlərimizi sevindirməyi çox istəyirik. Allah eləsin ki, bütün rəqiblərimizə qalib gəlib, bu istəyimizə nail olaq.

- Bəs siz özünüz komandanı buna hazır sayırsız?
- Biz buna sizdən az ümid etmirik. Çox ümidliyəm ki, bu, bizdə alınacaq.