Ramaldanov: Xorvatların bizi darmadağın edəcəyini düşünmürəm
Futbol üzrə Azərbaycan yığmasının və "Xəzər Lənkəran"ın müdafiəçisi Rasim Ramaldanovun azerisport.az saytına müsahibəsi
- Ötən gecə keçirilən dünya çempionatının açılış matçına - Braziliya - Xorvatiya görüşünə (3:1) baxdınız?
- Bunu necə buraxmaq olardı? Etiraf edim ki, braziliyalıların qələbə qazanmasını istəmirdim. Qonaqlara simpatiyam vardı. Hakim çox şübhəli penalti təyin etdi.
- Bu Xorvatiya yığması ilə bizi oktyabrda seçmə mərhələ oyunu gözləyir. Qorxulu təsir bağışlamadılar?
- Qorxulu deyildilər. Amma çox güclü komanda olduqlarını qeyd etməliyəm. Çox xoşuma gəldilər. Əks-hücum etməyi bacarırdılar. Hətta onların bu oyunda qələbə qazanacağını düşünürdüm.
- Sizə elə gəlmir ki, bu komanda yığmamızı oktyabrda darmadağın edə bilər?
- (gülür) İndidən bunu demək çətindi. Ümid edirəm ki, bizi darmadağın edə bilməzlər. Amma istənilən halda bizə çətin olacaq.
- Razısız ki, indiki halda onlar hətta İtaliyadan da güclüdülər?
- Mənə də elə gəlir ki, xorvatlar bizim qrupun favoritləridi və bu komandaya qarşı mübarizə aparmaq çox çətin olacaq.
- DÇ-də hansı komandaya üstünlük verirsiz?
- Elə bir xüsusi komandam yoxdu. Daha çox yaxşı futbol görmək istəyirəm. Amma konkret bir komanda seçməli olsam, mundialın qalibi kimi fransızları görmək istərdim. Onlara Zidanın dövründən simpatiyam var.
- "Xəzər Lənkəran" nə vaxt toplaşır?
- İyunun 24-də.
- Avrokuboklarda iştirak etməməyiniz sizə düşüb...
- (gülür) Avrokuboklarda oynamağımız daha yaxşı olardı.
- Oğuz Çətinin baş məşqçi təyin olunmasını necə qarşıladınız?
- Müsbət. Biz onun rəhbərliyi altında son mövsümdə də məşq etmişik. Özünü yaxşı tərəfdən göstərə bilib. O, son mövsümdəki işi ilə göstərdi ki, komandaya rəhbərlik edə bilər. Komandanı çıxardığı 5 oyundan dördündə qələbə qazandıq, yalnız birində heç-heçə oldu.
- Komandada qalacaqsız, ya harasa getmək fikriniz var?
- Heç yerə getməyə hazırlaşmıram. Mənim hələ klubla bir illik müqaviləm var.
