Hafiz Məmmədov: Çoxdan İngiltərəyə investisiya yatırmaq istəyirdim və klubu düz tapmışam

İngiltərə “Şeffild Uensdey”inin prezidenti Milan Mandariç “Bakı” FK-nın prezidenti, Fransanın “Lans” klubunun sahiblərindən biri Hafiz Məmmədovun bu klubun səhmlərinə sahib çıxmasını açıqlayıb. Azerisport.az xəbər verir ki, artıq həmyerlimiz də ingilis klubunu alması ilə bağlı fikirlərini dilə gətirib:

“Çox şadam və qürurluyam ki, biz belə gözəl klubun aksiyalarını almaqda razılığa gələ bilmişik. Mən ehtiraslı futbol azarkeşiyəm, İngiltərə futboluna dərin hörmətim var. İngiltərən olan kluba çoxdan investisiya yatırmaq istəyirdim. Ancaq klubu düz tapmaq üçün mənə vaxt lazım gəldi”.

“Düşünürəm ki, “bayquşların” iddiaları mənim iddialarımla uyğunlaşır. Onlar bizim şüarımızı təmsil edəcəklər: “Azərbaycan - Odlar diyarı”. Mən azarkeşlərə söz verirəm ki, komandanın uğur qazanması üçün  işləyəcəyəm”, deyə Məmmədov əmin edib.

Mandariç isə öz növbəsində bunları bildirib: “Mən şadam ki, Hafizlə razılığa gələ bildik. O, əsl futbol adamıdı. Bu oyunun ehtiraslı həvəskarıdı. O, bizim üç il qabaq başladığımız işi davam etdirməyə qadirdi. Özümün klubda ilk günüdə azarkeşlərə söz vermişdim ki, əgər komandanı tərk etsəm, klub olduğundan daha yaxşı vəziyyətdə olacaq və mən özümə əvəz qismində düzgün adam tapacağam. Düşünürəm ki, hər iki vədi yerinə yetirdim”.

Müqavilə futbol liqası tərəfindən təsdiq edilməlidi və bu yöndə daha heç bir şərh verilməyəcək.

Qeyd edək ki, “Şeffild Uensdey” İngiltərənin ən qədim klublarından biridi. Klub 1889-cu ildə İngiltərə futbol birliyinin - ölkənin ilk futbol strukturunun, həmçinin, 1992-ci ildə İngiltərə premyer-liqasının təsisçilərindən biri olub. “Bayquşlar” 1992-2000-ci illər aralığında premyer-liqada mübarizə aparıblar. Son illər klub Liqa 1-lə (İngiltərənin gücünə görə üçüncü liqası) Çempionşip (İngiltərənin gücünə görə ikinci liqası ) arasında “köç” ediblər. Ötən mövsümün yekunlarına görə klub 16-cı olub. Komandanı Stüart Qrey çalışdırır. Qrey bu vəzifəyə ötən mövsüm təyin edilib.