Britaniyalı jurnalistlər Hafiz Məmmədovun Şeffild Uensdeyi almasından yazdı

İngiltərə mətbuatı "Bakı"nın prezidenti, azərbaycanlı biznesmen Hafiz Məmmədovun bu ölkənin "Şeffild Uensdey" klubunun aksiyalarını satın almasına münasibət bildirib. Azerisport.az sizi britaniyalı jurnalistlərin açıqlamaları ilə tanış edir:

Martin Smit, "Features"in baş redaktoru: "Hafiz Məmmədov haqda çox şey bilməsəm də, klubu alması da çox gizli şəkildə həyata keçdi. Bu insan futbol biliyinə görə çox yaxşı təsir bağışlayır. Amma birdən-birə üç klubla ("Şeffild Uensdey"lə yanaşı, Məmmədov Fransanın "Lans" klubunun sahibi, Madrid "Atletko"sunun maliyyəçisidi - red.) əməkdaşlıq məlum problemlər yarada bilər. Ən azından onlara konsentrasiya olmaq baxımından".

Bob Uesterdeyl, "Sports"un baş redaktoru: "Uensdey"də indi sabitlik var. Hansı ki, əvvəllər yox idi. "Bayquşlar"ın azarkeşləri buna görə Milan Mandariçi həmişə xatırlayacaq. Ümid edirəm ki, bundan sonra bizi yaxşı transferlər gözləyir. Azarkeşlər klubun yeni sahibinin nə qədər pul xərcləyəcəyini bilmək istəyirlər. Yeni sahibkarın sayəsində uğurlar arta bilər. Amma bunun üçün böyük vaxt lazımdı".

Liam Houden, idman jurnalisti: "Bu insanın çoxlu pulu var. Yeni sahibkarın gəlişindən sonra ümid var ki, hədəflər böyüyəcək. Məsələn, Premyer Liqaya qayıtmaq. Yaxşı ki, danışıqlar tez yekunlaşdı. Amma Məmmədov tezliklə vacib məsələlərin qayğısına qalmalıdı. Baş məşqçi məsələsi, transferlər, klubun yeni hədəfləri indidən müəyyənləşməlidi".

Denni Holl, idman jurnalisti: "Bayquşlar" bu xəbəri artıq neçə il idi ki, gözləyirdi. Bu, klubun inkişafında yeni era sayıla bilər. Amma bu işdə Milan Mandariçin də xidmətləri unudulmamalıdı. Mandariç yuxulu nəhəngi fiaskodan xilas etdi və indi "Lans"ın sahibi bu komandanı yeni səviyyəyə qaldırmağa hazır görünür".

Pol Devis, "The Star"ın reportyoru: "Artıq çempionşip derbisində daha acı dad yarandı. Stüart Qreyin yeni büdcəni necə idarə edəcəyinə baxmaq çox maraqlı olacaq. Hansı ki, əvvəllər onun belə bir imkanı olmurdu".