AFFA liqaların qaliblərini mükafatlandırdı
Ötən gün AFFA-nın inzibati binasında U-19, U-16 və U-15 liqalarının 2013/2014-cü il mövsümünün qaliblərinin mükafatlandırılma mərasimi keçirilib. Azerisport.az xəbər verir ki, mükafatları AFFA-nın baş katibinin müavini Sərxan Hacıyev və futbol veteranı Rüstəm Rəhimov təqdim ediblər.
U-19 Liqasının 2013/2014–cü il mövsümündə 10 komanda, 271 oyunçu, 23 məşqçi qeydiyyatdan keçib və 135 oyun keçirilib. Liqaya 2013-cü il oktyabrın 5-də start verilib və 2014-cü il mayın 18-də yekunlaşıb. Mövsüm ərzində qapılara 531 qol vurulub. Turnirin ən məhsuldar oyunçusu 28 qolla "İnter" komandasının hücumçusu Bilal Qəmbərli olub. Liqada "Ən yaxşı oyunçu" "Qəbələ" komandasının oyunçusu Bəhlul Mustafazadə seçilib. U-19 liqasında 4-cü yeri "İnter", ikinci yeri isə "Qəbələ" komandası tutub. Liqanın qalibi adını "Bakı" komandası qazanıb.
U-16 Liqasının 2013/2014-cü il mövsümündə 15 komanda, 392 oyunçu, 31 məşqçi qeydiyyatdan keçib və 180 oyun keçirilib. Liqaya 2013-cü sentiyabrın 26-da start verilib və 2014-cü il mayın 25-də yekunlaşıb. Mövsüm ərzində qapılara 568 qol vurulub.
Turnirin ən məhsuldar oyunçusu 22 qolla "Qəbələ" komandasının hücumçusu Rövlan Muradov olub. Liqada "Ən yaxşı oyunçu" "Əlincə" komandasının oyunçusu Qara Qarayev deçilib. U-16 liqasında 3-cü yeri "Neftçi", 2-ci yeri isə "Bakı" komandası tutub.
Liqanın qalibi adını "Qəbələ" komandası qazanıb.
U-15 Liqasının 2013/2014-cü il mövsümündə 20 komanda, 463 oyunçu, 34 məşqçi qeydiyyatdan keçib və 210 oyun keçirilib. U-15 Liqaya 2013-cü il oktyabrın 1-də start verilib və 2014-cü il mayın 20-də yekunlaşıb. Mövsüm ərzində qapılara 739 qol vurulub.
Turnirin ən məhsuldar oyunçusu 34 qolla "Qəbələ" komandasının hücumçusu Elvin İmanlı olub. Liqada "Ən yaxşı oyunçu" "Qəbələ" komandasının oyunçusu Fərid Nəbiyev seçilib. U-15 liqasında 3-cü yeri "İnter", 2-ci yeri isə "Neftçi" komandası tutub. Liqanın qalibi adını "Qəbələ" komandası qazanıb. (AFFA)
