İnterin toplanışında gənc məşqçi

"İnter" hazırda Tükiyənin İzmit şəhərinin yaxınlığındaki Kartepe qəsəbəsində təlim-məşq toplanışı keçirir. Azerisport.az xəbər verir ki, iki gün əvvəl "bankirlər"in əvəzedici komandasının baş məşqçisi Rüstəm Əliyev də Türkiyəyə gələrək "İnter"in toplanışına qatılıb.

Qeyd edək ki, Rüstəm Əliyev üçün bu əsas komandanın düşərgəsinə birinci səfər deyil. Bundan əvvəl də gənc məşqçi əsas komandanın bir neçə toplanışında iştirak edib.

Başa çatmış mövsümdə əvəzedici komanda ilə çempion olan Rüstəm Əlyev Türkiyədəki toplanışda iştirak barədə danışıb:

"Öncə bu imkanı mənim üçün yaratdığında görə "İnter" Pəşəkər İdman Klubunun rəhbərliyinə öz təşəkkürümü bildirmək istərdim. Demək istərdim ki, bu cür toplanışlarda iştirak gənc məşqçilər üçün çox faydalıdı. Komandanın hazırlıq prosesini izləmək bizə böyük fayda verir, məşq prosesini izləyib hər zaman nəyisə öyrənirsən, özün üçün müəyyən qeydlər aparırsan və bu, gələcəkdə bizə çox kömək edə bilər. Başa çatmış çempionatda əvəzedici komandamız çempion oldu və bu, təkcə bizim yox - bütün klubun uğurudu. Klub rəhbərliyi və əsas komanda bütün mövsüm boyu bizə öz dəstəyini göstərib və biz də bu qələbəni onlara həsr edirik". (klub saytı)