“Mançester Yunayted Yay Futbol Məktəbi” Gündəliyi: 4-cü Gün.

Siz bilirsiniz, həyətdə oynadığımız futbol nə vaxt qurtarırdı? 

O vaxt ki, topun sahibi olan uşağın anası onu evə çağırırdı.

Bu xoş bir nostalgiyadır. Amma... Mən sevinirəm ki, o vaxtlar geridə qaldı. “Mançester Yunayted Yay Futbol Məktəbi”nə seçilən ən yaxşı uşaqların Azərbaycanın bölgələrindən olmasına isə daha çox sevinirəm. Sadəcə olaraq ona görə ki, ən yaxşıları məhz elə bölgələrdədir.

Gənc dostum, Bakının 6 nömrəli məktəbindən olan, möhtəşəm qapıçı Eldarın heç bir halda xətrinə dəymək istəmirəm. Ancaq düşünürəm ki, şəhərdəki imkanlar həmişə daha yaxşı olub. İndi isə imkanlar daha çox maşınlar üçündür.

Budur, bölgələr bizi sevindirir.

Tanış olun, Zeynəddin Qusardandır. Azərbaycan futbolunun gələcəyi. İngilis məşqçilər onu Zidan adlandırırlar. Mənə görə o, meydançadakı 32 uşaq arasında ən yaxşılardan biridir. Və ən təvazökarı.



Bu isə Gəncədən olan bombardir Zərrardır. Ən yaxşılar arasında məhz bu şəhərin təmsilçisini görmək sevindirici haldır. Gəncəli bombardir vurduğu qollardan sonra öz qanadlarını göstərərək sevinir. Zərrardan soruşanda ki, hansı klubda oynamağı arzulayırsan, heç düşünmədən cavab verir: “Hansı klubda oynamağım elə də vacib deyil, vacib olan hansı milli komandada oynamağımdır.” No Comments.

Ola bilsin ki, yetişən yeni nəsl bizim məşhur Bəhramı əsəbləşdirməyəcək. (Ümumiyyətlə mən Bahramla yüzdə yüz razıyam) Ürəyimdən gəldi... Üzürlü hesab edin...

Sevindirici haldır ki, əsl peşəkar nəsl yetişir, həm də vətənpərvər.

Və mən buna inanmağa başlayıram.

Emin Əfəndi.