5 iyun 2014 15:15
Millimiz tarixi rekorduna imza atdı
Millimiz FIFA-nın reytinq cədvəlində tarixinin ən yüksək göstəricisini göstərib. Azerisport.az xəbər verir ki, iyun ayı üçün reytinq cədvəlində millimizin göstəricisi ötən ayla müqayisədə, iki pillə yaxşılaşıb və komandamız 396 xalla 83-ci pillədə qərarlaşıb.
ABŞ yığmasına məğlubiyyət rəğmən, Şimali İrlandiya Və Səudiyyə Ərəbistanın reytinqdə geriləməsi də yığmamızın xeyrinə olub. İndi yığmamızı 82-ci pillədə qərarlaşmış Konqo Demokratik Respublikasından 1 xal ayırır (397 xal).
Xatırladaq ki, buna qədər millimizin FIFA reytinqində ən yüksək göstəricisi ötən ay yüksəldiyi 85-ci pillə idi.
Millimiz reytinq cədvəlində AÇ-2016-nn təsnifat mərhələsinin “H” qrupunda rəqiblərimizdən yalnız Maltanı qabaqlayır: İtaliya 9-cu (1104 xal), Xorvatiya 18-ci (903 xal), Norveç 55-ci (562 xal), Bolqarıstan 78-ci (425 xal), Malta 132-ci (204 xal) pillədə qərarlaşıb.
Keçmiş Sovet İttifaqı ölkələrindən reytinq cədvəlində ən yüksək pilləni Ukrayna tutur: 16-ci pillə, 915 xal. Rusiya 19-cu (893 xal) pillədə qərarlaşıb. Ermənistan 38-ci (682 xal), Özbəkistan 59-cu (539 xal), Belarus 82-cü (397 xal) sırada yer alıb və millimizi qabaqlayırlar. Gürcüstan (96; 349), Estoniya (98; 343), Moldova (101; 334), Litva (106; 319), Latviya (109; 293), Qazaxıstan (124; 241), Tacikistan (126; 229), Türkmənistan (183; 143) və Qırğızıstan (149; 163) isə millimizdən alt sıralarda qərarlaşıb.
Türkiyə 722 xalla 35-cidir.
Ayın ən yaxşı komandası 71 pillə irəliləmiş Fələstin millisi olub. 15 pillə geriləmiş Səudiyyə Ərəbistanı millisi isə ayın ən pis göstəricisinə imza atıb.
İlk onluq isə belə sıralanıb:
İspaniya (1485 xal), Almaniya (1300 xal), Braziliya (1242), Portuqaliya (1189 xal), Argentina (1175 xal), İsveçrə (1149), Uruqvay (1147 xal), Kolumbiya (1137 xal), İtaliya (1104), İngiltərə (1090).
