4 iyun 2014 11:22
Ərtuğrul Sağlam mübariz Mənsimovun yeni hədəfidir
“Xəzər Lənkəran”ın fəxri prezidenti Mübariz Mənsimov “Eskişehirspor”un baş məşqçisi Ərtuğrul Sağlamın xidmətlərində maraqlı olduğunu bildirib. Azerisport.az xəbər verir ki, “Beşiktaş”ın və “Bursaspor”un sabiq baş məşqçisi yaxın vaxtlarda “Xəzər Lənkəran”ı çalışdıra bilər.
Sağlamın hazırkı klubu ilə müqaviləsi olsa da, “Eskişehirspor”un ağır maliyyə vəziyyəti komandadan bir sıra oyunçuların getməsinə artıq rəvac verib. Kiçik yay büdcəsindən narazılığını baş məşqçi də dilə gətirib. (Sporx)
Sağlam “Bursaspor”un baş məşqçisi kimi Türkiyə çempionluğunu qazanıb, “Kayserispor”la İntertoto Kubokunun qalibi olub. Həmçinin, iki dəfə “Bursaspor” və “Eskişehirspor”la Türkiyə Kubokunun finalına yüksəlib.
Mustafa Dənizlinin “Xəzər Lənkəran”dan gedişindən sonra “gəmiqayıranlar”ın baş məşqçisi vəzifəsinə ən real namizəd kimi, rumın Mirça Rednikin adı hallanırdı. Həmçinin, Dənizlinin köməkçisi Oğuz Çətinin də namizədliyi istisna edilmirdi.
Xatırladaq ki, ötən mövsüm “Xəzər Lənkəran” Azərbaycan Superkubokunu qazanmış, çempionatda altıncı pilləni tutmuş və ölkə Kubokunun yarımfinalına çıxmışdı.
