4 iyun 2014 13:28
Lans Hafiz Məmmədovdan 15 milyon avro alacaq
Azərbaycanlı iş adamı, “Bakı” FK-nın prezidenti Hafiz Məmmədovun sahiblərindən olduğu Fransanın “Lans” klubu ötən mövsüm üçün qarşıya qoyulmuş tapşırığın öhdəsindən gələrək, Liqa-1-ə vəsiqə qazanıb. Azerisport.az xəbər verir ki, klubun Fransa futbol elitasına qayıdışı Hafiz Məmmədovun və Jerve Martelin iştirakı hesabına həyata keçib.
Martel 2012-ci ildə klub rəhbərliyindən uzaqlaşdırılmış, ancaq 2013-cü ilin iyul ayında kluba nəhəng sponsor cəlb edərək, geri dönmüşdü.
Ancaq “Lans”da xoşagəlməzliklər bununla bitməyib. Klubun iqtisadi vəziyyəti hələ də kifayət qədər kövrəkdir. Hətta komandanın baş məşqçisi Antuan Kombuare bu yay istefaya gedə bilər. “L'Equipe” nəşri bunun məşqçinin transferlərə kifayət qədər vəsait ala bilməyəcəyi təqdirdə baş verəcəyini yazır.
Buna rəğmən, mayın ortalarında elə həmin nəşr, Martelin klubun bu yay transfer fəallığının maliyyələşdirilməsinə təminata təsdiq əldə etməsi ilə bağlı Azərbaycana səfər etməsi haqda yazmışdı. Hafiz Məmmədovla görüş əsla rəsmi xarakter daşımayıb. Bu görüşdə tərəflər “Lans”ın yeni oyunçularla güclənməsi üçün 10 milyon avrodan 15 milyon avroya qədər vəsaiti olacağı haqda razılığa gəlmişdilər.
Bu, baş məşqçi Kombuarenin öz vəzifəsində qalması anlamına gəlir. Fransız həmkarlarımız əmindirlər ki, bu şəxs Məmmədov və Martelə məhz lazımlı fiqurdur. Məmmədovun maliyyələşdirdiyi “Atletiko” İspaniya çempionu olmaqla yanaşı, ÇL-in finalına yüksəldi. Əlbəttə, çoxları “Lans”dan da avrokuboklara çıxmaq uğrunda mübarizə gözləyəcək. Əgər komanda bu tapşırığın öhdəsindən gəlsə, bu, investorlar üçün “Atletiko”nun son iki mövsümdəki çıxışından heç də az uğur olmayacaq.
