29 may 2014 12:44
Elxan Məmmədov: UEFA çox suallar verəcək
AFFA-nın baş katibi Elxan Məmmədov azerisport.az saytına müsahibəsində Bakının Avropa çempionatını keçirmək şansları haqda danışıb:
“İlk növbədə demək lazımdır ki, ərizəni təqdim edərkən, biz öz şanslarımızı yaxşı təhlil etmişik. Təxmini təhlil etmişik ki, 32 şəhərdən 23-üü qalacaq. Ancaq daha az şəhər qaldı - 19. Bizim bölgədən alternativin olmaması da şanslarımızı yüksəldir. Buna rəğmən, biz kampaniyamızı davam etdirir, sənədləri doldururuq. Yaxşı təqdimat kitabımız alınıb. Kitab cənab prezidentin şəxsi və dövlət dəstəyi haqda məktubu ilə başlayacaq. Azərbaycan azsaylı ölkələrdəndir ki, prezident təqdimat kitabının hazırlanması haqda sərəncam imzalayıb. Bu, Avropa çempionatının ölkəmizdə keçirilməsinin dövlət tərəfindən dəstəkləndiyini bilavasitə sübut edir.
Bizə nə mane ola bilər? Sentyabrın 19-a qədər UEFA çox suallar verəcək. Komissiya gələcək və Bakının ərizəsinin bütün bəndlərini yoxlayacaq. Seçim isə səsvermə yolu ilə aparılacaq. Bu, bir tərəfdən subyektivdir. Ancaq qaydalar belədir. Ancaq İcraiyyə komitəsinin üzvlərinin fikri mane ola bilər. Əsası odur ki, onlardan hər biri bizim təqdimat kitabımızı əsaslı surətdə baxışdan keçirsin”.
