28 may 2014 00:22
Elxan Məmmədov: Mükafatlar yoldaşlıq oyunlarına şamil edilmir
AFFA-nın baş katibi Elxan Məmmədov azerisport.az saytına müsahibəsində mayın 28-i Bakı vaxtı ilə 07:10-da San-Fransiskonun “Kendlstik Park” stadionunda ABŞ və Azərbaycan yığmaları arasında keçiriləcək yoldaşlıq oyunu haqda fikirlərini bildirib:
“Biz məşqçi ilə dünya çempionatının iştirakçısı olan yığma ilə oyun keçirməyin vacibliyi haqda danışmışıq. Bu yığma ABŞ yığması oldu. Hesab edirəm ki, bu oyun bizə təcrübə üçün lazımdır. ABŞ yığması çox ciddi hazırlaşır və çox güman ki, millimizə qarşı döyüşkən heyət buraxacaqlar. ABŞ yığmasının baş məşqçisi başa düşür ki, Braziliyaya səfər ərəfəsində komandanın ruhunu yüksəltmək lazımdır və qələbə qazanmaq üçün hər şey edəcək. Bizə gəlincə, Berti Foqts futbolçuların vəziyyətinə baxacaq və təsnifat mərhələsinin ilk oyunlarında kimə etibar edə biləcəyini müəyyənləşdirəcək. Təəssüf ki, bir-iki oyunçu zədə səbəbi ilə iştirak etmir. Ancaq bizim başqa alternativimiz var”.
Baş katibin sözlərinə görə, millimizin rəqibi kifayət qədər mötəbərdir: “Buna mən belə yanaşıram: biz 15 gündən sonra dünya çempionatında iştirak edəcək bir komanda ilə oynayacağıq”.
Yoldaşlıq oyunları keçirməyə digər namizədlər Uruqvay və Nigeriyaya gəlincə, Məmmədov qeyd edib: “Sizə məlumdur ki, ABŞ kifayət qədər böyük ölkədir. Nigeriyalılar bizə Kaliforniyadan uzaqda oynamağı təklif etdilər. Bundan başqa, onlar oyunu iyunun 2-də keçirmək istəyirdilər. Bizim futbolçulara isə avrokuboklar ərəfəsində fasilə istirahət lazımdır. Buna görə də Nigeriya yığması ilə oyunu mütləq saymadıq”.
Qeyd etməyə dəyər ki, Uruqvay ümumiyyətlə, Cənubi Amerikada oynamaq istəyirdi.
Mükafatlara gəlincə, AFFA-nın baş katibi vurğulayıb: “Biz dəfələrlə demişik ki, mükafatlar heç vaxt yoldaşlıq oyunlarına şamil edilmir. Son illər diqqət edirik ki, futbolçular bu mövzunu hətta qaldırmırlar. Yox əgər federasiyanın sponsorlarından biri komandanı maliyyə cəhətdən dəstəkləmək istəsə, o zaman onlar bizə müraciət edirlər və biz müvafiq qərar qəbul edirik”.
