Sabah Qəbələ Kubokuna start veriləcək

Uşaq futbolunun inkişafını daim diqqət mərkəzində saxlayan, bu istiqamətdə böyük layihələr həyata keçirən “Qəbələ” İdman Klubu III Qəbələ Kubokunun startına hazırlaşır. Azerisport.az xəbər verir ki, bununla əlaqədar olaraq, "Qəbələ" klubun rəsmi saytı vasitəsilə press-reliz yayıb:

"Klubumuzun təşkilatçılığı ilə Qəbələdə 15 yaşa qədər futbolçulardan ibarət komandalar  arasında bu il üçüncüsü baş tutacaq beynəlxalq turnir təşkil edilir. Bir çox cəhətdən ilklərlə zəngin olan və  ölkəmizdə aşağı yaş qrupları üzrə klublar arasında keçirilən birinci beynəlxalq  turnir kimi tarixə düşən Qəbələ Kuboku bu il də Avropanın tanınmış  kollektivlərini Azərbaycana gətirir.  “Liverpul” (İngiltərə), “Fənərbağça” (Türkiyə), “Anderlext” (Belçika), “Rapid” (Avstriya), “Lokomotiv” (Rusiya), “Udineze” (İtaliya) komandalarının  iştirakı ilə keçiriləcək turnirdə Azərbaycan “Neftçi” və “Qəbələ” ilə təmsil olunacaq.

29 may - 1 iyun tarixlərində baş tutacaq turnirdə komandalar ilkin mərhələdə qruplarda mübarizə aparacaqlar. A qrupunda “Qəbələ”, “Fənərbağça”, “Udineze” və “Liverpul”, B qrupunda isə “Neftçi”, “Anderlext”, “Rapid” və “Lokomotiv” münasibətlərinə aydınlıq gətirəcəklər. Qrup oyunları mayın 29-u və 30-u, yarımfinal qarşılaşmaları və final isə iyunun 1-i keçiriləcək".