Özkara: ABŞ-la oyundan maksimum nəticə ilə ayrılmaq istəyirik
Mayın 20-dən ABŞ-da təlim-məşq toplanışında olan və mayın 27-də San Fransisko şəhərində ABŞ yığması ilə beynəlxalq yoldaşlıq oyunu keçirəcək Azərbaycan milli komandası hazırlığını davam etdirir. Azerisport.az xəbər verir ki, millimizin hücumçusu Cihan Özkara toplanışla bağlı fikirlərini bildirib:
“Toplanışımız yüksək səviyyədə təşkil olunub. Komanda daxilində ab-hava çox yaxşıdı. Tək çətinliyimiz saat fərqinin olmasıdı. Buna da uyğunlaşmağa çalışırıq. Məşqlərimiz çox intensiv şəkildə davam edir. Oyuna qədər tam hazır olmalıyıq.
ABŞ yığması haqda kifayət qədər məlumatımız var. Yurgen Klinsmanın komandası Braziliyada təşkil olunacaq dünya çempionatında iştirak edəcək. Bu qarşılaşma həm onlar, həm də bizim üçün əhəmiyyətlidi. ABŞ millisi üçün dünya çempionatı öncəsi son sınaqlardan biridisə, bizim üçün güclü rəqiblə oyunda hazırlığımızın hansı səviyyədə olmasını bilməyimiz baxımından vacibdi. Təbii ki, hər birimiz çalışıb bu görüşdən maksimum nəticə ilə ayrılmaq istəyirik”. (AFFA)
