Çempionlar Liqasını Real qazandı
UEFA Çempionlar Liqasında 2013/14 mövsümünün qalibi müəyyənləşib. Azerisport.az xəbər verir ki, qitənin bir nömrəli klub turnirinin həlledici oyununda ötən gecə iki İspaniya komandası - "Real" və "Atletiko" qarşılaşıb.
Həlledici oyunda eyni ölkə, hətta eyni şəhər təmsilçilərinin çıxması matça əlavə rəng qatırdı. Statistikaya görə, iki klub bu oyunadək bütün turnirlərdə 264 dəfə qarşılaşmışdı ki, bu oyunlarda “Real”ın əzici üstünlüyü vardı. “Kral klubu”nun 143 qələbəsinə qarşı, “Atletiko” cəmi 64 görüşdə meydanı qalib qismində tərk etmişdi. 57 qarşılaşma isə sülhlə nəticələnmişdi. Bu matçlarda “Real”ln vurduğu 480 qola "Atletiko" 340 qolla cavab vermişdi.
Cari mövsümdən danışanda La Liqada "Atletiko", Kral Kubokunda isə "Real"ın üstünlüyü nəzərə çarpırdı. Belə ki, komandalar hər turnirdə iki dəfə olmaqla ümumilikdə 4 dəfə qarşılaşmışdı. "Real" Kral Kubokunun yarımfinalındakı hər iki oyunda qalib gələrək (3:0, 0:2) adını finala yazdırmışdı. La Liqada isə "Atletiko" səfərdə əzəli rəqibini minimal hesabla (0:1) məğlub etmişdisə, ev oyununda 2:2 heç-heçəyə razılaşmışdı.
Bu oyunda isə hesabı "Atletiko" açıb. İlk yarıdakı bu qoldan sonra tərəflər çox çalışsa da, hesab uzun müddət dəyişməyib. Artıq hamı "Atletiko"nun qələbə qazandığını düşündüyü bir vaxtda səhnəyə çıxan Serxio Ramos buraxılan qolun əvəzini çıxıb. Əlavə vaxtda daha üç qol vuran "Real" ÇL-in ən güclüsü adını qazanıb.
Qeyd edək ki, bu, "Real"ın sayca 10-cu belə uğurudu. Komanda bundan öncə 12 dəfə ÇL-də final oynamışdı ki, bunlardan 9-da kuboku muzeyinə aparmışdı. Sonuncu dəfə 2002-ci ildə turnirin qalibi olmuş "Kral klubu" bu il 13-cü finalında 10-cu uğurunu qazandı. "Atletiko" isə tarixində heç vaxt ÇL-in qalibi olmayıb. Bu komanda tarixində ikinci dəfə ÇL-in finalında məğlub oldu.
Çempionlar Liqası
Final
24 may
Real (İspaniya) - Atletiko (İspaniya) - 4:1
Qollar: Serxio Ramos, 90+3, Qaret Beyl, 110, Marselo, 118, Ronaldo, 120-pen. - Dieqo Qodin, 36.
Lissabon. "Estadio Luis" stadionu.
Baş hakim: Byörn Kuypers (Hollandiya).
