Ramin Musayev: Foqtsun legionerlərdən imtina etməsini dəstəkləyirəm

Peşəkar Futbol Liqasının prezidenti Ramin Musayev azərbaycanlı gənc futbolçulara daha çox şans verilməsinin tərəfdarıdı. Azerisport.az saytına müsahibəsində o, bunları söyləyib:

"Azərbaycan Kubokunun final oyunundan öncə "Neftçi"nin baş məşqçisi Böyükağa Hacıyevin çıxışını eşitdim. O, bildirmişdi ki, kubok finalında iştirak etməyəcək Mahir Şükürovla Araz Abdullayevi Məqsəd İsayevlə Samir Məsimov əvəzləyəcək. Həmin gənclər finalda çox uğurlu çıxış etdilər. Məsimov hətta qol da vurdu. Hansı ki, o top Premyer Liqada legioner hücumçuların vurduğu qollardan da xeyli gözəl alındı".

Musayev yığmamızın baş məşqçisi Berti Foqtsun da gənclərə şans verməsinin vacibliyindən danışıb: "Mən yerli gənclərin çıxışını yüksək qiymətləndirirəm. Bir müddət öncə legioner futbolçuların xidmətindən imtina edən yığmamızın baş məşqçisi Berti Foqtsu da dəstəkləyirəm. Elə ən yaxşısı azərbaycanlı gənclərə üstünlük verməkdi. Onlara daha çox güvənmək, yoxlamaq lazımdı.

Hərdən məni də, AFFA-nı da "Sumqayıt"a görə çox tənqid edirlər. Halbuki, bu komandada çoxlu sayda gənc azərbaycanlı futbolçu çıxış edir. "Sumqayıt"ın "Qəbələ" ilə oyununa böyük məmnuniyyətlə baxdım. Onlar demək olar ki, rəqibinə heç nədə uduzmurdu".