22 may 2014 11:11
Aslan Kərimov: Qəbələ psixoloji baxımdan bir addım öndədir
Veteran futbolçu, milli komandanın məşqçisi Aslan Kərimov Azərbaycan kubokunun finalı barədə fikirlərini bildirib. Azerisport.az xəbər verir ki, ötənlərin məşhur futbolçusu gərgin oyun olacağını bildirib:
“Son dövrlərin ən gərgin final qarşılaşması olacağını düşünürəm. Hər iki komandanın heyətində səviyyəli futbolçular çıxış edir. Öz aralarındakı oyunlar da gərginliyi ilə yadda qalıb. Çempionatın son oyununda “Qəbələ”nin səfərdə “Neftçi”ni məğlub etməsini xatırlamaq kifayətdir. Ardıcıl 3 il çempion olan, ötən mövsüm kuboku qazanan flaqman bu mövsümü medalsız başa vurmaq niyyətində deyil. Əgər kuboku qazanması, bu il onlar üçün uğursuz hesab olunacaq”.
Bu cür qarşılaşmalarda psixoloji hazırlığın əhəmiyyətli olduğunu vurğulayan millimizin məşqçisi şansları dəyərləndirərkən “Neftçi”nin heyətindəki itkiləri xatırladıb:
“Şanslara gəlincə, konkret hansısa komandanın üstün olduğunu demək çətindir. Bu cür görüşlərdə əsasən psixoloji hazırlıq əsas rol oynayır. Əlbəttə heyətdəki itkilər də oyuna təsirsiz ötüşməyəcək. Misal üçün, Mahir Şükürovun cəzalı, Araz Abdullayevin zədəli olması “Neftçi” üçün ciddi itkidir. Bununla belə, meydana çıxacaq futbolçuların kuboku qazanmaq üçün sonacan mübarizə aparacaqları istisna deyil. Məncə, şanslar 50-nin 50-yədir”.
Hər iki komandanın heyətində fərdi ustalığı yüksək səviyyədə olan futbolçuların yer aldığını vurğulayan “Qarabağ”ın sabiq üzvü “Qəbələ”nin psixloji cəhətdən bir addım öndə olduğunu sözlərinə əlavə edib:
“Yuxarıda qeyd etdiyim kimi, bu cür final oyunlarını psixoloji hazırlıqla yanaşı futbolçuların fərdi ustalığı həll edir. Hər iki komandanın heyətində fərdi ustalığı yüksək səviyyədə olan futbolçular var. Həlledici məqamda son vuruşu dəqiq yerinə yetirən komanda sonda qələbəni bayram edəcək. “Qəbələ”nin son oyunda “Neftçi” üzərində qələbə qazanması futbolçuların özlərinə olan inamını bir qədər də artırıb. Fikrimcə, psixoloji hazırlıq baxımından “Qəbələ” bir addım öndədir”.
