Dodo: Kubokun finalında uduzsaq, faciə olmayacaq
"Qəbələ"nin yarımmüdafiəçisi Dodonun azerisport.az saytına müsahibəsi
- Demək olar ki, "Qəbələ" "Neftçi" ilə kubokun final oyununa rəqibindən daha rahat çıxacaq?
- "Neftçi"nin özünü necə hiss edəcəyini deyə bilmərəm. Amma biz bu oyuna ciddi hazırlaşırıq. Bəlkə də klub tarixinin ən vacib oyununa çıxacağıq. Əlbəttə, minimum vəzifənin öhdəsindən gəlmişik - çempionatın bürünc mükafatçısı olduq, avrokuboklara vəsiqə qazandıq, amma bunlar final matçının əhəmiyyətini azaltmır.
- "Qəbələ"yə Azərbaycan kubokunu qazanmaq nə dərəcədə vacibdi?
- Çox vacibdi. "Qəbələ" böyük klub olsa da, titulları yoxdu. Çempionatın bürünc medalı başqa, ölkə kubokunu qazanmaq başqa...
- "Neftçi"ni bu oyunun favoriti sayanlarla razısız?
- Rəqibimiz ciddi komandadı. Kubokun hazırkı sahibidilər. Amma mən final oyununda favorit axtarmaq fikrində deyiləm. Hər iki komandanın qalib olmaq şansı bərabərdi.
- Kubokun finalında məğlub olsaz, bunu faciə hesab etmək olar?
- Mən bunu faciə hesab etməzdim. Yaxşı mövsüm keçirmişik, indi də kuboku qazanmaq istəyirik.
- "Qəbələ" tarixində ilk dəfə avrokuboklarda iştirak hüququ qazanıb. Artıq indidən xəyallar qurursuz?
- Etiraf edim ki, hələ bu barədə düşünmürəm. Çünki biz hələ bu mövsümü başa vurmamışıq. Amma bütövlükdə götürsək, mən komandamla avrokuboklarda oynamağı çoxdan arzulayırdım. Fikrimcə, "Qəbələ" Azərbaycanı Avropada layiqincə təmsil edəcək.
