Yuri Syomin: Bürüncü nəinki klubun, həmçinin özümün şəxsi nailiyyəti hesab edirəm

“Qəbələ”nin baş məşqçisi Yuri Syomin futbol üzrə Azərbaycan çempionatında qazanılmış bürünc medallar haqda fikrini bölüşüb. Azerisport.az “Sport-ekspress”ə istindən Syominin fikirlərini diqqətinizə çatdırır:

“Bürünc”ü nəinki klubun, həmçinin özümün şəxsi nailiyyəti hesab edirəm. Azərbaycan çempionatının ən güclüləri üçlüyünə düşmək nəinki şərəfli, həmçinin, son dərəcə çətindir. Son vaxtlar ölkənin ən yaxşı klubları keyfiyyətli legionerlərlə gücləniblər və medallar uğrunda ciddi mübarizə gedirdi.

Mənə xüsusilə xoşdur ki, liderlər üçlüyünə faktiki olaraq, yeni komanda ilə düşmək mümkün oldu. Əvvəllər bir-birini tanımayan insanları bir məqsəddə birləşdirə bildik. Bu işdə klub rəhbərliyinin böyük əməyi var. Onlar bizə işləmək və oyunlara hazırlaşmaq baxımından rahat şərait yaratdılar.

Bizim yüksəlişimiz və enişimiz oldu. Ancaq komandadakı mənəvi ab-hava kluba yenidən öz səviyyəsini yığmağa və çempionatın yekun kəsiyini uğurla keçirərək, ilk dəfə Avropa Liqasının iştirakçısı olmağa imkan verdi.

Hesab edirəm ki, klub öz inkişafında düzgün yoldadır. Biz çempionatda yaxşı işlədik. Ancaq qarşıda mövsümün əsas oyun - Azərbaycan Kubokunun finalı var ki, bura da “Qəbələ” ilk dəfədir çıxıb”.