Qarabağ ilk transfer bombasını partlatmağa hazırlaşır
Çempionlar Liqasına vəsiqə qazanan "Qarabağ" artıq ilk transfer bombasını partlatmağa hazırlaşır. Azerisport.az xəbər verir ki, ağdamlılar daha bir brazillyalı futbolçunu heyətinə cəlb etmək istəyir.
Bu, hazırda Portuqaliyanın "Maritimo" klubunun şərəfini qoruyan Danilo Diasdı. "Qarabağ"ın baş məşqçisi Qurban Qurbanov vaxtilə bu oyunçunun xidmətində maraqlı olsa da, klubu onu buraxmamışdı. Ağdam klubunun rəsmi "facebook" səhifəsində yazılanlara görə, bu dəfə danışıqlar daha konkret aparılacaq. Belə ki, "Qarabağ" öz nümayəndəsini artıq braziliyalı hücumçu ilə transfer məsələlərini danışmaq üçün sözügedən ölkəyə göndərib.
Tam adı Danilo Leandro Dias olan hücumçu 1985-ci ilin 6 noyabrda dünyaya göz açıb. "Qoyas"ın yetirməsi olan Dias bu komandada cəmi 8 oyun keçirib. O, 2006-cı ildə "Bandeirante", "Qama", "Atletiko Qoyaniense" kimi klublara icarəyə verilib. 2007-ci ildə "Qoyania"da icarə əsasında çıxış edən Dias 2008-ci ili də "Noroeste"də eyni qaydada keçirib. 2009-cu ildə isə o, "İpatinqa" klubu tərəfindən transfer olunub. 2009/10 mövsümündə bu komandada 7 oyun keçirib 2 qol vuran Danilo elə həmin mövsüm icarə əsasında "Uberaba"da da çıxış edib. Ağdam klubunun hədəfində olduğu forvard 2010-cu ildən "Maritimo"ya keçib və o dövrdən bəri çıxdığı 103 oyunda 12 qola imza atıb.
