14 may 2014 11:40
UEFA AÇ-2020-nin səsvermə prosedurasını təsdiqlədi. Bakıya 19 iddiaçıdan seçiləcək 13-lüyə düşmək lazımdır
UEFA-nın İcraiyyə Komitəsi Turindəki iclasında AÇ-2020-nin final mərhələsinin ev sahibləri olacaq şəhərlərin müəyyən edilməsi üçün səsvermə prosedurasını təsdiqləyib.
Azerisport.az xəbər verir ki, AÇ-2020-nin oyunlarını keçirmək üçün ümumilikdə 19 şəhər iddiasını irəli sürüb və bu şəhərlərin arasında ölkəmizin paytaxtı Bakı da var. Avqusta assosiasiyaları tenderdə iştirak etməyən İcraiyyə komitəsinin üzvləri bütün ərizələri hər birində ən azı iki şəhər olmaqla, altı və ya səkkiz regional zonaya böləcəklər.
“Regional zonalar üzrə müəyyənləşdirmə AÇ-ni qəbul edəcək şəhərləri təyin edərkən, bizə bütün Avropanı əhatə etmək imkanı verəcək. Səsvermə prosedurasına gəlincə, əvvəlcə, finalın və yarımfinalların təşkilatçıları seçiləcək. Sonra 1/4 finalın dörd və qrupdakı üç görüşün sahibləri müəyyənləşəcək. Daha sonra 1/8 final və qrup mərhələsinin üç oyunu əvvəlki iki mərhələdə seçilməmiş coğrafi ərazilərin təmsilçilərinə veriləcək. Yekunda isə 1/8 final və qrup mərhələsinin yerdə qalan oyunları müəyyənləşəcək”, UEFA-nın rəsmi saytında deyilir.
UEFA-nın İcraiyyə komitəsi yekun qərarını sentyabrın 19-da İsveçrənin Cenevrə şəhərində keçiriləcək xüsusi mərasimində elan edəcək.
Xatırladaq ki, UEFA-nın İcraiyyə Komitəsi UEFA prezidenti Mişel Platininin sədrliyi ilə 2012-ci ilin dekabrında Lozannadakı görüşdə AÇ-ni bir və ya iki ölkədə keçirməkdənsə, 2020-ci ildə “Avropa üç Avro” keçirməyi qərara almışdı. 2013-cü ilin yanvarında isə UEFA-nın İcraiyyə Komitəsi final mərhələsinin Avropanın 13 şəhərində keçiriləcəyini təsdiqləmişdi.
(R-Sport)
