Ruslan Poladov: Rəvandan kömək istəyən olmayıb

"Simurq"un kapitanı Ruslan Poladovun azerisport.az saytına müsahibəsi

- Qarşıda sizi "Rəvan"la oyun gözləyir. Hansı ki, bu komanda "Sumqayıt"la elitada qalmaq uğrunda mübarizə aparır. Bu mübarizə sizə maraqlıdı?
- Bizim öz hədəflərimiz var. Digər komandaların durumu bizi maraqlandırmır. Qələbəyə oynayacağıq.

- "Simurq"un nə hədəfi qalıb ki?
- Hədəf həmişə var. Düzdü, biz əsas vəzifəmizin öhdəsindən gələ, avrokuboklara düşə bilmədik. Amma mümkün olduğu qədər turnir cədvəlinin üst pillələrində yer almaq istəyirik.

- "Rəvan"da yəqin ki, tanışlarınız çoxdu. Təsadüfən sizdən kömək istəyən olmayıb?
- Mənim Premyer Liqanın bütün klublarında tanışlarım var (gülür). Onların hamısı məni yaxşı tanıyır və heç biri belə bir söhbət açmaz. Hətta söhbət elitada qalmaqdan yox, çempionluqdan getsə belə. Belə şeyləq qəbulolunmazdı. Ona görə "Rəvan"dan da heç kim belə bir müraciət etməyib. Çətin ki, etsinlər də.

- Bu mövsümü "Simurq" üçün boşa verilmiş saymaq olar?
- Mən belə deməzdim. Komanda böyük təcrübə topladı və inanıram ki, bu təcrübə növbəti mövsümdə bizə kömək edəcək. Yəqin ki, qarşımıza yenə yüksək hədəflər qoyulacaq.

- Yəqin ki, büdcəsi sizdən daha çox olan bir klubu qabaqlamaq sizin üçün sevindiricidi?
- Mən bunu təkcə "Xəzər Lənkəran"a aid etməzdim. Mənim üçün güclü klubların hər birindən aldığımız xal və ya xallar xoşdu. Məsələn, "Qarabağ"a biz bu mövsüm ümumiyyətlə uduzmadıq. Halbuki, bu komanda çempion olmağa yaxındı.

- Sizin "Simurq"dakı taleyiniz necə olacaq?
- Mövsümün sonunda müqaviləmin müddəti başa çatacaq. Hələ ki, rəhbərliklə bu barədə söhbətim olmayıb. Mövsümün sonunda görüşüb, söhbətləşəcəyik. İstisna deyil ki, yenə bu komandada qalım.