29 aprel 2014 14:00
Süleymanov: XL azarkeşi ilə görüşdən sonra Neftçini tərk edə bilməzdim
“Neftçi”nin vitse-prezidenti Tahir Süleymanov azerisport.az saytına müsahibəsində klub rəhbərliyinin onu mövsümün sonuna qədər vəzifəsində saxlamaq qərarına münasibətini açıqlayıb:
“Mən istefa xahişini kluba edilən təzyiqlərə görə vermişdim. İstəmirdim ki, mənə görə komanda bu mövsümdə əziyyət çəksin. Təzyiqlər bu gün də davam edir. “Qarabağ”a qarşı oyunda Reynaldo Ramosu dirsəyi ilə açıq-aşkar vurdu. Ancaq buna rəğmən, meydandan qovulmadı.
Bu ərizədən sonra məni dəstəkləyən hər kəsə təşəkkür edirəm. Bir amili qeyd edim: “Rəvan”la Kubok oyunu ərəfəsində həmrəylik əlaməti olaraq, Sadıq Sadıqov oyuna getmədi. Biz bu oyuna klubun bazasında baxdıq. Klub azarkeşlərinə, xüsusilə, “Sector 11” fan-qrupuna və futbol ictimaiyyətinə təşəkkür edirəm. Məni hətta “Xəzər Lənkəran”ın köhnə azarkeşlərindən biri də dəstəklədi və görüşmək istəyini bildirdi. Biz klubun bazasında görüşdük. O, dəstəyini bildirdi və müqəddəs Quran hədiyyə etdi. Bütün bunlardan sonra mən etiraz edə bilməzdim və ölkə Kubokunun final oyununun sonuna qədər klubda qalıram. Sonra isə biz mənim klubdakı gələcəyimi müəyyən edəcəyik. Məsələ 20 min manatda deyil (“Neftçi”nin cərimə məbləği - red.), bu, klubu təzyiqlərdən azad etmək istəyidir”.
