28 aprel 2014 18:22
Muarem Muarem: Qarabağın tarixinə düşmək qürurvericidir
TPL-in 32-ci turunda turda “Qarabağ” “Neftçi”ni qəbul edib. Azerisport.az xəbər verir ki, Azərbaycan derbisində tərəflər hərəyə bir qolla bir xal qazanıblar.
Yüksək tempdə, zövqlü qarşılaşmada “Qarabağ” oyunda geri düşsə də, 51-ci dəqiqə Muarem hesabı bərabərləşdirib. Maraqlıdır ki, bu “Qarabağ”ın çempionatlar tarixində vurduğu 900-cü qol kimi düşüb.
Makedoniyalı türk klubun rəsmi saytına verdiyi açıqlamada həm “Neftçi” ilə oyundan, həm də komandanın durumundan danışıb:
“Gördüyünüz kimi, oyun çox gərgin keçdi. Derbi oyunu idi, istər-istəməz ab-hava da başqa idi. Zənnimcə, maraqlı qarşılaşma oldu və azarkeşlər darıxmadılar. Qola gəlincə, bu “Neftçi”yə vurduğum ilk qoldur. 900-cü qola gəlincə, əlbəttə, yaddaqalan məqamdır. “Qarabağ” tarixinə düşmək qürurvericidir. Təbii ki, qalib gəlmək istəyirdik. Amma derbidə istənilən nəticənin qeydə alınması mümkündür. “Neftçi”nin də ciddi hədəfləri var. Qeydə alınan nəticəni normal hesab edirəm. Hərçənd, ikinci yarıda fərqlənmək üçün ciddi imkanlarımız vardı. Amma dediyim kimi, artıq bu oyunu unudub növbəti qarşılaşmalara baxmalıyıq. Çünki, bizi final dəyərində dörd qarşılaşma gözləyir. Artıq bu oyunları düşünməliyik”.
