26 aprel 2014 11:33
Joze Alesio: Kayrata qarşı Barselonadan çətin olacaq
“Araz” Bakıda azarkeşlərə final sevinci yaşada bilməsə də, “bürünc” uğrunda mübarizədə bəraət qazanmağa çalışacaq. Azerisport.az xəbər verir ki, futzal üzrə UEFA Kubokunun Dördlər finalının yarımfinal mərhələsində İspaniya nəhəngi “Barselona”ya yalnız penaltilər seriyasında məğlub olmuş komandamız (4:4, pen. 2:4), üçüncü yer uğrunda oyunda Qazaxıstanın “Kayrat” komandası ilə oyunda azarkeşlərimizi parlaq oyunla sevindirməyə çalışacaq.
Bu çətin məqamda milli futzal federasiyasının prezidenti Zaur Axundov komandanın bazasına gələrək, kollektivi dəstəkləyib:
“Yarımfinalı unutmaq və fikirləri “Kayrat”a qarşı oyuna yönəldib bu oyuna köklənmək lazımdır”, deyə Axundov futbolçularla görüşdə qeyd edib.
Komandanın baş məşqçisi Joze Alesio da məhz bununla məşğuldur:
“Kayrat”a qarşı oyun “Barselona”ya qarşı keçirilmiş oyundan daha da çətin olacaq. Axı komanda ötən yarışda UEFA Kubokunu qazanıb. Onlar finala yüksələ bilməyiblər və ən azı yarışı üçüncü pillədə bitirmək istəyində olacaqlar”, deyə Alesio bildirib.
“Kayrat” yarımfinalı elə də güclü keçirmədi. Ancaq bu, o demək deyil ki, Qazaxıstan çempionu zəifdir. Sabah keçiriləcək oyun tam fərqli olacaq. Onların əksər oyunçuları braziliyalılardır. Braziliyalılar isə dünyada ən yaxşı futzalçılardır”, deyə ALesio əlavə edib.
Xatırladaq ki, komandamız 2010-cu ildə nüfuzlu qitə turnirində üçüncü olmağı bacarmışdı.
(UEFA-nın rəsmi saytına istinadən)
