Qəbələ Avroliqaya getmək üçün mütləq kuboku qazanmalıdı
"Qəbələ" və "Neftçi"nin Azərbaycan kubokunun finalına çıxması demək olar ki, yayda ölkəmizi avrokuboklarda təmsil edəcək komandaların kim olacağını müəyyənləşdirdi. Azerisport.az xəbər verir ki, hazırda avrokuboklarda ölkəmizi təmsil edəcəyi dəqiqləşən yeganə komanda "Qarabağ"dı.
Ağdam klubu böyük ehtimalla qarşıdakı turların birində çempionluğunu bayram edəcək və Azərbaycanı Çempionlar Liqasında təmsil edəcək.
"Qəbələ" kubokun finalında qələbə qazansa, Avropa Liqasında çıxış etmək şansı qazanacaq. Özü də Yuri Syominin komandası kubokdan vəsiqə qazandığı üçün, Avroliqaya birbaşa ikinci təsnifat mərhələsindən başlayacaq. Belə olsa, Avroliqanın ilk təsnifat mərhələsindən mübarizəyə qoşulacaq təmsilçilərimiz Premyer Liqanı ikinci və üçüncü pillədə başa vuran komandalar olacaq. Hazırda bu yerlərdə müvafiq olaraq "İnter"lə "Neftçi" qərarlaşıb.
Əgər kubokun finalında "Neftçi" qalib gəlsə, o zaman Avroliqanın ikinci təsnifat mərhələsindən mübarizəyə qoşulacaq Azərbaycan təmsilçisi məhz bu komanda olacaq. "Neftçi" eyni zamanda çempionatda 2 və ya 3-cü yerlərdən birini tutacağı halda, Avroliqadakı digər təmsilçilərimiz çempionatı 2, 3 və 4-cü pillərdən birini tutan iki komanda olacaq. Hazırda 4-cü pillədə qərarlaşan komanda isə "Bakı"dı.
Kubokun finalçısı heç bir halda avrokuboklarda iştirak hüququ qazanmayacaq. Hətta "Neftçi" möcüzə edib "Qarabağ"ı adlasa, çempion olsa, üstəlik, kuboku qazanıb, "qızıl dubl"a da imza atsa, "Qəbələ"nin Avroliqaya yollanmaq şansı olmayacaq. O zaman Premyer Liqanın ikincisi Avroliqaya ikinci təsnifat mərhələsindən başlamaq hüququ qazanacaq, 3 və 4-cü pillələrin sahibləri isə Avroliqanın ilk təsnifat mərhələsindən mübarizəyə qoşulacaq.
