Kubokun finalçıları bəlli olur
Bu gün Azərbaycan kubokunun yarımfinal mərhələsinin cavab oyunları keçiriləcək. Azerisport.az xəbər verir ki, qarşılaşmalar Bakıda və Lənkəranda baş tutacaq.
Öncə diqqətlər paytaxta yönələcək. "Rəvan" doğma meydanda "Neftçi" ilə haqq-hesab çürüdəcək. Mərhələnin sürpriz komandası olan Bayıl klubu ilk görüşdən də sərfəli nəticə ilə dönmüşdü. "Bakcell Arena"dakı görüş 1:1 hesabı ilə yekunlaşmışdı. "Rəvan"ın turnir cədvəlindəki mövqeyi komandaya mənfi təsir etsə də, kubokun bu mərhələsinə qədər yüksəlmək Bayıl təmsilçisi üçün əlavə stimul sayıla bilər. Bu hesab Güvənç Kurtarın yetirmələrini qane etsə də, "ağ-qaralar"ın ürəyincə deyil. Son 3 ilin çempionunun turnir cədvəlindəki yerini nəzərə alsaq, Böyükağa Hacıyev tək titulunu kubokda qazana bilər. Son oyunda "Neftçi"nin doğma meydanda "Sumqayıt"a məğlub olduğunu da göz önünə gətirsək, "Bayıl Arena"da maraqlı və gərgin oyun olacağını demək olar. Qolsuz heç-heçə və istənilən hesablı qələbə meydan sahiblərini finala daşıyacaq. "Neftçi" isə ya qələbə qazanmalı, ya da 2:2 və ya daha çox qollu heç-heçəyə imza atmalıdı.
Növbəti oyunda isə "Xəzər Lənkəran" və "Qəbələ" komandaları üz-üzə gələcək. Premyer Liqada heç bir iddiası qalmayan cənublular 10 illiyində yalnız kuboku qazanmaq arzusundadı. Lakin ilk oyundan sonra böyük ehtimalla "ağ-yaşıllar"ın bu istəyi də baş tutmayacaq. Qəbələdə qeydə alınan 0:3 hesablı məğlubiyyət Mustafa Dənizlinin komandasını kubokdan kənarlaşdıra bilər. Belə ki, Lənkəran təmsilçisinin oyunu ən azından əlavə vaxta saxlaması üçün 90 dəqiqəni 3:0 hesablı qalib başa vurması lazımdı. "Qəbələ"də isə üzlərin güldüyünü demək olar. Doğma meydanda rəqib qapısından 3 cavabsız top keçirən Yuri Syominin komandası bu görüşə daha rahat çıxacaq. Bundan başqa "qırmızı-qaralar"ın Premyer Liqa iddiası da davam etməkdədi. Mövsüm ərzində göstərdikləri oyuna və ilk oyunun nəticəsinə əsasən "Qəbələ"nin böyük ehtimalla finala vəsiqə qazanacağını demək olar.
Azərbaycan kuboku
Yarımfinal (cavab oyunları)
24 aprel
17:00. Rəvan - Neftçi
AFFA nümayəndəsi: Ramiz Abdullayev.
Hakim-inspektor: Xaqani Məmmədov.
Bakı. "Bayıl Arena".
İlk oyun - 1:1.
19:00. Xəzər Lənkəran - Qəbələ
AFFA nümayəndəsi: Abbas Hüseynov.
Hakim-inspektor: Gülağa Cabbarov.
"Xəzər Lənkəran" mərkəzi stadionu.
İlk oyun - 0:3.
