Davron Erqaşov: Qəbələ Lənkəranda 3 qol buraxmayacaq

"Qəbələ"nin tacikistanlı müdafiəçisi Davron Erqaşovun azerisport.az saytına müsahibəsi

- Komandada atmosfer necədi? Elnur Allahverdiyevlə bağlı situasiya, Yannik Kamananın komandadan göndərilməsi son iki qələbənin yaratdığı ruh yüksəkliyinə kölgə salmayıb ki?
- Son qələbələrə qədər heç də yaxşı ab-hava yox idi. Amma kubokdakı, Premyer Liqadakı qələbələrdən sonra təbii ki, vəziyyət yaxşılaşıb. Artıq Lənkəranda yaxşı oyun və nəticə gözləyirik. Qeyd etdiyiniz olaylara gəlincə, bunlar komandadakı atmosferə təsir etməyib.

- "Qəbələ"nin pis günlərini geridə qoyduğunu, qələbələrinin davamını gətirəcəyini demək olar?
- Biz də bunu istəyirik. 2014-cü ildəki bərbad startdan sonra vəziyyəti yaxşılaşdırmağa borcluyuq.

- XL ilk oyunda 0:3 hesabıyla uduzsa da, cavab oyununa optimist yanaşırlar. Siz bu barədə nə düşünürsüz?
- Bu, normaldı. Əks halda cavab oyununa çıxmağa dəyməz. Fikrimcə, maraqlı oyun olacaq. Hər şey ola bilər.

- "Qəbələ" Lənkəranda 3 qol buraxa bilər?
- Fikrimcə, 3 qol buraxmayacağıq. İlk oyundakı kimi oynamalıyıq. Belə olsa, finala çıxmağımızda problem yaranmaz.

- Finala çıxsaz, hansı komanda ilə qarşılaşmaq istərdiz?
- "Neftçi" yaxşı komandadı və fikrimcə onlar "Rəvan"a uduzmayacaqlar. Finalda məhz onları gözləyirəm. Finalda "Neftçi"yə qarşı oynamağı çox istəyirəm.

- Adətən rəqiblər daha zəif komanda ilə qarşılaşmağı istəyirlər...
- Kubokun finalı kiçik hadisə deyil. Məncə, "Qəbələ" - "Neftçi" finalının afişası daha cəlbedicidi.

- Siz bilirsiz ki, "Qəbələ" kuboku qazanmaqla tarixi bir uğura imza atacaq və ilk dəfə avrokuboklarda iştirak hüququ qazanacaq?
- Bunu hamı bilir və oyunun məsuliyyətini anlayır. Biz hələ Premyer Liqada da 3-4-cü yerlərdən birini tutmaq şansımızı saxlayırıq.