Şpiçiç: Neftçi onlara müdafiəçinin qol vuracağını gözləmirdi

"İnter"in xorvatiyalı müdafiəçisi Matiya Şpiçiçin azerisport.az saytına müsahibəsi

- Son turda "Neftçi" üzərində qələbə qazandınız (2:1). Bu qələbə barədə nə deyə bilərsiz?
- Vacib oyun idi. Birinci növbədə ilk üçlükdəki yerimizi qorumaq üçün qələbə qazanmalıydıq. Avrokuboklara getmək istəyiriksə, əsas rəqiblərimizdən birini məğlub etməyə borcluyduq. Bu, bizə müyəssər oldu. Maraqlı və gərgin qarşılaşma alındı. Tam layiqli qələbə qazandıq.

- Bu qələbə sayəsində ikinci pilləyə qalxmağınızı nəzərə alsaq, yəqin ki, hədəfiniz də dəyişib...
- Əlbəttə. İndi mövsümü üçüncü yerdə yox, ikinci pillədə də qapaya bilərik. Amma buna görə eyforiyaya qapılmaq lazım deyil. Mövsümün sonuna altı tur qalıb. Bu qələbəni unudub "Bakı" ilə vacib oyuna hazırlaşmaq lazımdı.

- Mövsümə çox pis başlayan "İnter"in gümüş medal qazanması uğurlu nəticə sayıla bilər?
- Fikrimcə, hə. Çünki 5-6 turdan sonra biz sonuncu pillədəydik. O vaxt heç kim avrokuboklar haqda düşünmürdü. İndi isə fərqli situasiya yaranıb. İnanırıq ki, avrokubok zonasındakı yerimizi qoruya biləcəyik.

- Yeri gəlmişkən, "Neftçi"yə hər iki qolu siz vurdunuz. Hansı ki, sol cinah müdafiəçisi üçün bu, nadir hallarda rast gəlinən bir uğurdu...
- (gülür) Yəqin rəqib müdafiəçilərin onlara qol vuracağını gözləmirdi. Düzünü deyim ki, hər oyunda hücumlara qoşulmağa çalışıram. İmkan olduqca da qol vururam.

- Yəqin ki, sizin bu qollarınız Xorvatiya mətbuatının da diqqətindən kənarda qalmayacaq...
- Bilmirəm (gülür). Ola bilər. Prinsipcə, məni orada pis tanımırlar. Əsas komanda istisna olmaqla, bütün aşağı yaş qrupları üzrə yığmalarda çıxış etmişəm.

- Xorvatiyanın AÇ-2016-nın seçmə mərhələsində Azərbaycanla eyni qrupa düşməsini nəzərə alsaq, püşkatmadan sonra sizə zəng etməyiblər?
- Xeyr. Amma mümkündü ki, Xorvatiya - Azərbaycan matçı öncəsi ölkənizlə daha çox maraqlanmağa başlasınlar.