Avroliqada yarımfinalçılar bəlli oldu
Çempionlar Liqasından sonra ötən gecə Avropa Liqasında da bütün yarımfinalçıların adına aydınlıq gəlib. Azerisport.az xəbər verir ki, mərhələnin bütün oyunları eyni gündə baş tutub.
Turnirin əsas favoriti sayılan “Yuventus” ilk matçda səfərdə minimal hesabla məğlub etdiyi Lion “Olimpik”ini qəbul edib. Bu oyunda “Yuve”nin yarımfinala vəsiqəni təmin edəcəyi gözlənilirdi ki, Turin təmsilçisi çətin qələbə sayəsində istəyinə çatıb.
Eynilə “Alkmaar” və “Benfika” arasındakı ilk qarşılaşmada da qonaqlar 1:0 hesablı qələbəyə sevinmişdi. Odu ki, evində hesabın verdiyi rahatlıqla oynayan “Benfika” cütün favoriti sayılırdı. Portuqaliya təmsilçisi doğma meydanda daha inamlı qələbə qazanaraq, yarımfinala yüksəlib.
Daha bir 1:0 hesabı ilə bitən matç “Portu” – “Sevilya” görüşü idi. Portuqallar evdə qələbə qazansa da, bu hesab onları rahatlaşdıra bilməzdi. Çünki “Sevilya”nın vuracağı bir qol hər şeyi dəyişə bilərdi. Amma İspaniya təmsilçisi 1 yox, qonaq komandaya düz 4 qol vurdu ki, bu da bir qədər gözlənilməz hesab oluna bilər. Hər halda möhtəşəm qələbə "Sevilya"nı Avroliqanın yarımfinalına çıxarmış oldu.
"Valensiya" – “Bazel” görüşündə isə yarımfinalçının qonaqlar olacağını rahatlıqla söyləyənlər çox idi. Çünki ilk matçda isveçrəlilərin 3:0 hesabı ilə qalib gəlməsi belə deməyə əsas verirdi. Amma İspaniya klubu gözlənilmədən öz meydanında bu qolların əvəzini çıxmağı bacardı. 90 dəqiqədə cütün qalibi müəyyənləşmədiyindən əlavə vaxta ehtiyac duyulub. Məhz bu yarım saat ərzində daha iki qol vuran "Valensiya" son yarımfinalçı olub.
Avropa Liqası
1/4 final (cavab oyunları)
10 aprel
Benfika (Portuqaliya) - AZ Alkmaar (Hollandiya) - 2:0 (İlk oyun 1:0)
Qollar: Rodriqo, 39; 71.
Valensiya (İspaniya) - Bazel (İsveçrə) - 5:0 (İlk oyun 0:3)
Qollar: Alkaser, 38; 70; 113, Varqas, 42, Bernat, 118.
Sevilya (İspaniya) - Portu (Portuqaliya) - 4:0 (İlk oyun 0:1)
Qollar: Rakitiç, 5-pen, Vitolo, 26. Bakka, 29, Qameyro, 79.
Yuventus (İtaliya) - Olimpik (Lion, Fransa) - 2:1 (İlk oyun 1:0)
Qollar: Pirlo, 4, Markizio, 68 - Briand, 18.
