Ruslan Abışov: Reynaldo və Flavinyonu yığmamıza cəlb etməyə dəyməz
Futbol üzrə Azərbaycan yığmasının və Rusiyanın "Rubin" klubunun müdafiəçisi Ruslan Abışovun azerisport.az saytına müsahibəsi
- Azərbaycan yığmasının tarixində ilk dəfə FİFA reytinqində 85-ci pilləyə yüksəlməsini necə qarşıladınız?
- Ötən illərlə müqayisədə bu, çox böyük uğurdu. Amma biz daha yüksəkdə ola bilərdik.
- Yəni, bu, sizin üçün ən yaxşı göstərici deyil?
- Əlbəttə, yox. Biz daha yaxşısına nail ola bilərik.
- Nəyə?
- 85-ci pillədən yuxarıdakı istənilən pilləyə (gülür). Azərbaycan yığmasının səviyyəsi yüksəlib. Biz daha çox qələbə qazanmağa borcluyuq. O zaman reytinq mövqeyimiz də yaxşı olar. Bunun üçün isə futbolçularımız xaricdə oynamalıdılar. Ən azı 5-6 futbolçumuzun ölkədən kənarda oynaması lazımdı. Daha güclü yığmamızın olmasını istəyiriksə, futbolçularımızın legioner həyatı yaşamasına ehtiyac var.
- Amma bizim oyunçulardan hələ heç kim Avropada özünü göstərməyə qadir deyil...
- Fikrimcə, oyunçularımızın xarici klublarda çıxış etməsi üçün yaxşı menecerlərə ehtiyac var. Bizim qonşuları - erməniləri götürək. Onların demək olar ki, bütün yığma üzvləri xaricdə çıxış edirlər. Elə yeddi futbolçuları Rusiya Premyer Liqasında top qovur.
- Yığmamızın baş məşqçisi Berti Foqtsun ABŞ yığmasında çalışmasını necə qarşıladınız?
- Ona yeni işində uğurlar arzulayıram. Foqtsun oradakı işi müvəqqətidi. Sadəcə, dünya çempionatı zamanı bu komandaya kömək edəcək. Bizim isə həmin dövr üçün heç bir planımız yoxdu.
- Futbol ictimaiyyəti hazırda "Qarabağ"ın yarımmüdafiəçisi Reynaldonun Azərbaycan millisində çıxış etməsinin mümkünlüyünü müzakirə edir. Siz bu barədə nə deyə bilərsiz?
- Fikrimcə, buna dəymir. Ona qalsa, Flavinyonu da vaxtında yığmaya dəvət etmək lazım idi. Həmin mövqedə çıxış edə biləcək oyunçularımız var. Mən ümumiyyətlə, milliləşdirmənin əleyhinəyəm.
- Amma Reynaldo Flavinyodan daha güclüdü...
- O, "Neftçi"dəki ilk mövsümündə çox güclü təsir bağışlayırdı. İstənilən halda, bu barədə qərarı AFFA verir.
