ÇL-də ilk yarımfinalçılar bəlli oldu
UEFA Çempionlar Liqasında ilk yarımfinalçıların adına aydınlıq gəlib. Azerisport.az xəbər verir ki, ilk oyun günündə iki qarşılaşma baş tutub.
Ötən həftə İspaniyada keçirilən oyunda Dortmund "Borussiya"sını 3:0 hesabı ilə darmadağın edən "Real" bu dəfə "Siqnal İduna Park"da rəqibini devirməyə çalışıb. Hərçənd ki, bu oyunda madridlilərin elə də böyük səy göstərməsinə ehtiyac yox idi. Çünki Yurgen Kloppun yetirmələri 2 top fərqi ilə qalib gəlsə belə, turu keçən tərəf "Kral klubu" olacaqdı. Almaniya təmsilçisi elə ilk hissədə buraxılan qollardan ikisinin əvəzini çıxmağı bacarıb. Amma meydan sahiblərinin bundan artığına gücü çatmadığı üçün, növbəti mərhələyə "Real" adlayıb.
Günün digər matçı isə "Çelsi" və PSJ arasında keçirilib. Fransada baş tutan oyunda rəqibinə 3:1 hesabı ilə qalib gələn Liqa-1 nəhəngi cavab oyununda bu üstünlüyünü qorumağı hədəfləmişdi. Joze Mourinyonun yetirmələrinə isə bu oyunda 2:0 hesablı qələbə də kifayət edirdi. İngiltərə nəhəngi bu istəyinə nail olub və iki cavabsız qolla adını növbəti mərhələyə yazdırıb.
Çempionlar Liqası
1/4 final (cavab oyunları)
8 aprel
Borussiya (Dortmund, Almaniya) - Real (İspaniya) - 2:0 (İlk oyun 3:0)
Qollar: Roys, 24; 37.
Çelsi (İngiltərə) - PSJ (Fransa) - 2:0 (İlk oyun 1:3)
Qollar: Şürle, 32, D.Ba, 87.
