5 aprel 2014 15:40
Milinko Pantiç: Komandam heç vaxt müdafiəmeylli çıxış etməyəcək
“Bakı” sabah Topaz Premyer Liqasının 29-cu turu çərçivəsində səfərdə “Neftçi” ilə qarşılaşacaq. Azerisport.az xəbər verir ki, bu gün oyunöncəsi son məşqini keçirən komandanın baş məşqçisi Milinko Pantiç klub saytına görüş haqda fikirlərini açıqlayıb:
“Çox çətin oyunda “Neftçi” kimi böyük rəqibə qarşı oynayacağıq. Yaxşı heyəti olan komandanı güclü məşqçi çalışdırır. Hansı ki, “Neftçi”nin baş məşqçisi Böyükağa Hacıyev birvaxtlar “Bakı”nın “sükanı arxası”nda ölkə çempionu olub. Qələbə qazanmaq çətindi amma həyatda mümkünsüz heç nə yoxdu.Bu isə 3 xalı düşündüyümüzdən xəbər verir. Vərəqə cəzaları olan (Etto, Vüqar Mustafayev) və 3 zədəli futbolçunun (Rauf Əliyev, Namiq Ələsgərov və Elvin Məmmədov) yoxluğu bizə böyük problem yaradacaq. Belədə heyəti müəyyənləşdirmək çətindi. Hətta komandamda ehtiyatda oturmaq üçün oyunçu çatışmazlığı var. Ancaq bu, özümə bəraət qazandırmaq kimi çıxmasın. Bütün bunlar “Bakı”nın səfərdə müdafiəmeylli oyun göstərməsini şərtləndirmir. Yox, komandam heç vaxt bu cür çıxışa meyl etməyəcək. Əksinə, ilk dəqiqələrdən üstünlük qazanmağa çalışacağıq”.
