3 aprel 2014 11:44
Saşa Yunisoğlu: Mənim ikinci Denizlisporum olmayacaq
Türkiyənin “Tekden Denizlispor” klubunun müdafiəçisi, futbolçumuz Saşa Yunisoğlu azrisport.az saytına müsahibəsində komandadakı gələcək taleyi haqda danışıb.
Xatırladaq ki, klub prezidenti Mehmet Özsoy yerli KİV-ə açıqlamasında bildirib ki, Yunisoğlunun uzunsürən zədəsi səbəbi ilə futbolçu ilə müqaviləyə qarşılıqlı razılaşma əsasında xitam verilməsi qərara alınıb.
“Mənim Denizlidən gedəcəyim vaxt məsələsi idi. Klubun mənə, həmçinin futbolçulara 8 aylıq borcu və həmçinin, son iki oyuna görə mükafat haqqı qalır. Hər şey heç kimin heç nə almayacağına doğru gedir. Dünən komandadaxili toplantı keçirilib. Oyunçular borcları ödənilməyənə qədər məşqlərə çıxmamaq qərarına gəliblər”, deyə Yunisoğlu bildirib.
Futbolçumuz daha irəli gedərək, növbəti mövsümün də daxil olduğu müqaviləsinə xitam vermək qərarına gəlib: “Bu amil, mənim səbrimin son damlası oldu. Belə ki, mənim müqaviləm iki ilə nəzərdə tutulmuşdu. Mən klub prezidenti ilə görüşüb bildirdim ki, növbəti mövsümdə klubda qalmaq istəmirəm. Qarşılıqlı razılaşma əsasında qərar gəldik ki, 2014/15-ci illər mövsümündə mən komandada olmayacağam. Ancaq mayın sonlarına qədər mən “Tekden Denizlispor”un futbolçusu olaraq, qalacağam. Ancaq mən inanmıram ki, onlar borcları ödəyəcəklər və mən mövsümün sonun gözləmədən, Türkiyə futbol federasiyasına şikayət ərizəsi ünvanladım. Kluba borcları ödəmək üçün vaxt verəcəklər. Əgər “Tekden Denizlispor” yaxın vaxtlarda borcları ödəməzsə, bu halda, mən mövsümün sonunu gözləmədən, azad agent statusu alacağam”, deyə təcrübəli müdafiəçi qeyd edib.
Hələlik, Yunisoğlu növbəti mövsümə planları ilə tələsmir: “Ola bilsin ki, karyerama Vətəndə davam edəcəyəm. Türkiyədə qalmağımı da istisna etmirəm. Mənə maraq göstərmiş iki klub artıq var. Türkiyə klublarının xüsusiyyətləri mənən artıq məlumdur və mənim ikinci “Tekden Denizlispor”um olmayacaq. Hazırda federasiyadan azad agent olmağım və daha “Tekden Denizlispor”a məxsus olmadığım barədə rəsmi təsdiq sənədi gözləyirəm”, deyə Yunisoğlu fikrini tamamlayıb.
