Real darmadağınla qalib gəldi, Çelsi uduzdu
Çempionlar Liqasının 1/4 final mərhələsinin ilk oyunlarına yekun vurulub. Azerisport.az xəbər verir ki, Liqa-1-in lideri PSJ öz meydanında "Çelsi"ni sınağa çəkibsə, Madrid “Real”ı ötən mövsüm yarımfinalda yolunu kəsən Dortmund “Borussiya"sı ilə münasibətlərinə aydınlıq gətirib.
Şübhəsiz ki, gecənin ən diqqət çəkən matçı da elə “Real" - "Borussiya" qarşıdurması olub. İngiltərəli referi Mark Klattenburqun idarə etdiyi oyun bu klublar arasında avrokuboklardakı 9-cu duel idi. Hansı ki, bu matçlarda “Kral klubu”nun 3:2 üstünlüyü vardı. 3 görüş isə bərabərliklə nəticələnmişdi. Bu qarşılaşmada isə "Real" ötən mövsüm ev oyununda bu komandadan aldığı ağır məğlubiyyətin əvəzini çıxmağı bacarıb.
Serbiyalı Milorad Maziçin idarə etdiyi günün digər oyununda isə Paris klubu üstün olub. Loran Blanın yetirmələri inamlı qələbəyə seviniblər. Amma Joze Mourinyolu "Çelsi" ən azı səfərdə vurduğu bir qolla təsəlli tapa bilər. İstənilən halda bu cütün taleyinə Londondakı cavab görüşündə aydınlıq gələcək. Xatırladaq ki, bu klublar avrokuboklarda cəmi 2 dəfə qarşılaşıb. Komandalar ÇL-in 2004/05 mövsümündə eyni qrupda yer alıblar. İngiltərədəki matç qolsuz başa çatsa da, “Çelsi” səfər oyununda PSJ-ni 3 cavabsız qolla məğlub edib.
Çempionlar Liqası
1/4 final (İlk oyunlar)
2 aprel
PSJ (Fransa) - Çelsi (İngiltərə) - 3:1
Qollar: Lavetsi, 4, D.Luis, 61-öz qapısına, Pastore, 90+4 - Hazard, 27-pen.
Real (Madrid, İspaniya) - Borussiya (Dortmund, Almaniya) - 3:0
Qollar: Beyl, 3, İzko, 27, Ronaldo, 57.
