30 mart 2014 01:22
Böyük oyunda beş böyük məqam
Azerisport.az TPL-in 28-ci turu çərçivəsində “Neftçi” və “Xəzər Lənkəran” komandaları arasında keçirilmiş “Böyük oyun”un beş diqqətçəkən məqamını təqdim edir:
İlk dəfə olaraq, son 23 ay ərzində “Böyük oyun”un taleyini bir qol həll etdi. Son dəfə minimal hesablı qələbə 2012-ci ilin aprel ayına təsadüf etmişdi. O zaman “gəmiqayıranlar” “neftçilər”i məğlub etmişdi. O vaxtdan bəri, komandalar iki dəfə qolsuz heç-heçə oynayıblar.
“Neftçi”nin hücumçusu Ernest Nfor bu mövsüm vurduğu qolların demək olar ki, yarısını “Xəzər Lənkəran”ın qapısında keçirib. Kamerunlu futbolçu ötən ilin noyabr ayının 2-də “Flaqman”ın cənubluları 4:1 hesabı ilə darmadağın etdiyi “Böyük oyun”da da fərqlənmişdi.
Demək olar ki, artıq altı ildir, “Xəzər Lənkəran” səfərdə əzəli rəqibini məğlub edə bilmir. Cənub təmsilçisinin Bakıda son qələbəsi 2008-ci ilə təsadüf edir. Ümumiyyətlə, səfər qələbələri bu dueldə dəb deyil.
Mustafa Dənizlinin komandaya gəlişindən sonra, “Xəzər Lənkəran” ilk dəfə ikinci ardıcıl məğlubiyyətini yaşadı. Ötən tur “Simurq” da cənubluları məğlub etmişdi.
“Neftçi” isə ardıcıl dördüncü oyundur ki, məğlub olmur. Böyükağa Hacıyevin yetirmələri 12 mümkün xaldan hamısını toplayıb. Həmçinin, Kubokun yarımfinalına vəsiqə qazanıblar. Bu müddət onların aktivinə yazıla bilər.
