27 mart 2014 11:44
AFFA Elvin Məmmədovu 10 oyunluq cəzalandırdı
AFFA İntizam Komitəsinin növbəti iclası keçirilib. Azerisport.az xəbər verir ki, iclasda AFFA bayrağı altında keçirilmiş müxtəlif yarışlarda baş vermiş neqativ hallar müzakirə edilib və müvafiq qərarlar çıxarılıb, intizam tədbirləri görülüb:
22 mart 2014-cü il Həvəskarlar arasında Azərbaycan birinciliyinin “Mehdiabad” - “Qəbələ-2” matçı meydanın ot örtüyünün yararsız vəziyyətdə olması səbəbindən baş tutmayıb. İntizam Komitəsinin qərarına əsasən oyun yenidən keçiriləcək.
22 mart 2014-cü il Həvəskarlar arasında Azərbaycan birinciliyinin UGİM (Buzovna) - “Şəfəq” matçının 61-ci dəqiqəsində oyun dayandırılıb. Belə ki, “Şəfəq” klubunun 95 №-li futbolçusu Şəhriyar Yəhyayev, 2 №-li futbolçusu Musa Hüseynli , 12 №-li futbolçusu Emil Cəfərov hakimi təhqir etmiş və “Şəfəq” klubunun 1 №-li futbolçusu Elvin Məmmədov hakimə qarşı fiziki təsir göstərmişdir. Yuxarıda göstərilənləri nəzərə alaraq, İntizam Komitəsi aşağıdakı qərarları qəbul edir:
- “Şəfəq” klubunun 95 №-li futbolçusu Şəhriyar Yəhyayev, 2 №-li futbolçusu Musa Hüseynli , 12 №-li futbolçusu Emil Cəfərov hakimi təhqir etdiklərinə görə hər bir futbolçu 4 oyunluq cəzalanır.
- Şəfəq” klubunun 1 №-li futbolçusu Elvin Məmmədov hakimə qarşı fiziki təsir göstərdiyinə görə futbolçu 10 oyunluq cəzalanır.
- Oyun yarımçıq dayandırıldığı üçün “Şəfəq” klubuna 0:3 hesablı texniki məğlubiyyət verilir.
22 mart 2014-cü il Həvəskarlar arasında Azərbaycan birinciliyinin “Bayıl Rovers” - “Boradigah” matçının 90+1-ci dəqiqəsində “Bayıl Rovers” klubunun 5 №-li futbolçusu Hunter Filip idmançıya yaraşmayan hərəkətə görə ikinci sarı vərəqə alaraq meydandan kənarlaşdırıldığı üçün futbolçu 1 oyunluq cəzalanır.
(AFFA)
