26 mart 2014 00:28
Vaqif Cavadov Bakının ən yaxşısı oldu
"InStat Football" şirkəti Premyer Liqanın 27-ci turu çərçivəsində keçirilən “Qəbələ” - “İnter” matçının statistik göstəricilərini təqdim edib. Azerisport.az xəbər verir ki, 90 dəqiqə ərzində “bankirlər” rəqib qapısına 15 zərbə endirib.
“Qəbələ” isə 10 zərbəylə fərqlənib. Bununla yanaşı, meydan sahibləri çərçivəyə 3 dəfə, qonaqlar isə 8 dəfə zərbə endiriblər.
Ötürmələrdə də üstünlük “İnter”in tərəfindədi. Belə ki, oyun ərzində "bankirlər" 431-i dəqiq olan 512 ötürməylə fərqlənib. “Qəbələ” isə 487 ötürmə edib və bunlardan 411-i dəqiq olub. Dəqiq ötürmələrin faizi hər iki komandada bərabər olub - 84 %.
Topa sahib olmaqda da “İnter” öndədi. 49 faizə qarşı 51 faiz. “İnter”in futbolçuları 134 mübarizənin 75 dəfə qalib gəliblər. “Qəbələ”nin oyunçuları isə cəmi 59 mübarizdən qalib ayrılıblar.
Kaxaber Sxadadzenin yetirmələri oyun ərzində 71 hücumla fərqləniblər, ev sahibi komanda isə 103 hücum təşkil edib. "İnter" 32 hücumu cinahlardan təşkil edib. “Qəbələ” isə 41 hücuma cinahlardan keçib.
Oyun ərzində ən çox ötürmə edən futbolçu "İnter"in oyunçusu Derlis Meza Kolli olub. O, 70-i dəqiq olan 76 ötürmə ilə seçilib. "Qəbələ"nin heyətində ən çox ötürmə edən futbolçu isə Lorenso Ebesilio olub - 71 ötürmə, 56 dəqiq. Lakin dəqiq ötürmələrə görə bu komandanın heyətində Dodo birinci olub - 60 dəqiq ötürmə.
Oyun ərzində qapını ən çox nişan alan oyunçular "Qəbələ"nin futbolçuları Lorenso Ebesilio və Viktor Mendi olublar - hərəyə 5 zərbə. "İnter"in heyətində isə Vaqif Cavadov 4 zərbə ilə seçilib.
"InStat Football" şirkətinin hesabatına görə oyunun ən yaxşı futbolçusu "İnter"in kapitanı Vaqif Cavadov olub. Qeyd edək ki, Vaqif bu qarşılaşmada iki məhsuldar ötürmə ilə fərqlənib.
