22 mart 2014 01:31
Rəşad Sadiqovun Novruz sərgüzəştləri və ya sonra hara?
Bu günlərdə Rəşad Sadiqov “Neftçi”nin əvəzedici heyətinə göndərildi. Azeripsort.az xəbər verir ki, futbolçunun idman formasının aşağı səviyyədə olması, komandanın məşqçi qərargahını müvafiq addıma sövq edib.
Bununla da Sadiqovun burada idman formasını yığacağı niyyətini güdən komandanını məşqçi heyəti, futbolçu ilə vidalaşmaq fikrində olmadığını göstərdi. Digər tərəfdən, bu, Sadiqovun transferə çıxarılması haqda dolaşan söz-söhbətin əsassız olduğu anlamına gəlir.
Ancaq görünür vəziyyət belə qalmayacaq və Sadiqovun “Neftçi”dən ayrılacağı özünü çox gözlətməyəcək. Bir neçə mövsüm əvvəl Sadiqov kapitan sarğısını daşıdığı “Qarabağ”ı da tərk etmişdi. O zaman rəsmi təsdiqini tapmasa da, futbolçunun bu addımında komandanın baş məşqçisi Qurban Qurbanovla münaqişə şayiə olaraq dolaşırdı.
Deyəsən, oxşar vəziyyət təkrarlanır. Sadiqov əvəzedicilərlə məşq etmir. Məşqlərə gəlmir və bu da məşqçi qərargahında haqlı narazılıq doğurur. Bu əsnada isə “Flaqman”ın kapitan sarğısı Mahir Şükürova keçib.
Artıq Sadiqova “elçi” düşənlər də üzə-araya çıxmaqdadır. “Qarabağ”a qayıdış mümkünsüzdürsə, “gəmiqayıranlar”ın baş məşqçisi Mustafa Dənizli Sadiqovun xidmətində maraqlı olduğunu gizlətmir. Bu sevda baş tutsa, Sadiqov bir qatı rəqibi digərinə dəyişmiş növbəti futbolçu olacaq.
