16 mart 2014 00:33
Rəvan Zaqatala sınağına hazırdır
“Rəvan” Topaz Premyer Liqasının 26-cı turu çərçivəsində “Simurq” ilə üz-üzə gələcək. Azerisport.az xəbər verir ki, artıq komanda oyunun hazırlığını tamamlayıb.
Zaqatala şəhər stadionunda bu gün keçirilmiş məşq hazırlıq prosesində sonuncu olub. Təxminən bir saat davam etmiş məşqdə baş məşqçi Güvənc Kurtar yetirmələrinə son tapşırıqlarını verib. Əvvəlcə, dar sahədə topu özündə saxlamaq üzərində işləyən futbolçular sonra qapıya zərbələr üzərində işləyiblər. Məşqin sonu standart vəziyyətlərə həsr olunub.
Qeyd edək ki, "Rəvan” Zaqatalaya heyətində bir neçə aparıcı futbolçusu olmadan yollanıb. Belə ki, Lukaş Sapela, Novruz Məmmədov, Julio Sezar və Oke Akpoveta cəzalıdır. Üstəlik, baş məşqçi qarşıdan "Bakı” ilə vacib kubok oyununun keçiriləcəyini nəzərə alaraq, Ramazan Abbasov, Mitya Moreç, Dmitri Kruqlov, Miloş Adamoviç, Mişel Balokoq və Ayaz Mehdiyev kimi aparıcı oyunçulara əlavə istirahət imkanı yaradıb və bu futbolçuları Zaqatalaya aparmayıb.
Xatırladaq ki, "Simurq” - "Rəvan” oyunu martın 16-ı 15:00-da başlayacaq.
(Klub saytı)
