13 mart 2014 13:13
Millimiz FIFA reytinqində 91-ci sırada
Millimiz FIFA-nın mart ayı üçün reytinq cədvəlində 91-ci pillədə qərarlaşıb. Azerisport.az xəbər verir ki, Berti Foqtsun yetirmələrinin hesabında 369 xal var ki, bu da, ötən fevral ayı ilə müqayisədə üç xal azdır.
Buna rəğmən, millimiz iki pillə yüksəlib. Xüsusən Estoniya və Çin yığmalarının reytinqdə geriləməsi buna şərait yaradıb.
Yarış cədvəlində qonşularımız Yeni Zelandiya (373 xal) və Estoniyadır (367 xal).
Millimiz reytinq cədvəlində AÇ-2016-nn təsnifat mərhələsinin “H” qrupunda rəqiblərimizdən yalnız Maltanı qabaqlayır: İtaliya 8-ci (1112 xal), Xorvatiya 16-cı (955 xal), Norveç 57-ci (559 xal), Bolqarıstan 67-ci (518 xal), Malta 134-cü (186 xal) pillədə qərarlaşıb.
Qarşıdakı yoldaşlıq görüşündəki rəqibimiz ABŞ isə 1017 xalla 14-cüdür.
Keçmiş Sovet İttifaqı ölkələrindən reytinq cədvəlində ən yüksək pilləni Ukrayna tutur: 18-ci pillə, 911 xal. Rusiya 19-cu (889 xal) pillədə qərarlaşıb. Ermənistan 41-ci (699 xal), Özbəkistan 55-ci (565 xal), Belarus 83-cü (420 xal) sırada yer alıb və millimizi qabaqlayırlar. Estoniya (92; 367), Gürcüstan (99; 333), Litva (105; 314), Moldova (108; 303), Latviya (113; 265), Tacikistan (121; 237), Qazaxıstan (127; 213), Türkmənistan (142; 166) və Qırğızıstan (146; 155) isə millimizdən alt sıralarda qərarlaşıb.
Türkiyə 710 xalla 38-cidir.
Ayın ən yaxşı komandası 18 pillə irəliləmiş Vyetnam millisi olub. 43 pillə geriləmiş Myanma millisi isə ayın ən pis göstəricisinə imza atıb.
İlk onluq isə belə sıralanıb:
İspaniya (1510 xal), Almaniya (1336 xal), Argentina (1234 xal), Portuqaliya (1199 xal), Kolumbiya (1183 xal), Uruqvay (1126 xal), İsveçrə (1123 xal), İtaliya (1112 xal), Braziliya (1104 xal) və Belçika (1084 xal).
