12 mart 2014 18:11
Joze Alesio: Yalnız final haqda düşünürəm
“Araz”ın baş məşqçisi Joze Alesio futzal üzrə UEFA Kubokunun Dördlər Finalının püşkatmasından sonra komandasının rəqibi olacaq “Barselona” haqda fikrini bildirib və komandasının perspektivlərinə toxunub. Azerisport.az Alesionun fikirlərini diqqətinizə çatdırır:
“Bütün komandalar güclüdür. Oyun təşkili baxımından mən “Barselona”nı dünyada ən yaxşı sayıram. Bizi asan yarış gözləmir. Ancaq yenə də, şanslar var. Ciddi hazırlaşmaq lazımdır. Bürünc medallar haqda heç düşünmürəm. Yalnız final haqda düşünürəm. “Kayrat” - “Dinamo” cütü çox güclüdür”, deyə Alesio bildirib.
Braziliyalı mütəxəssis qeyd edib ki, komandaya iki yeni futbolçu cəlb edilib: “Hazırlığa vaxtımız var. Komandaya iki yeni futbolçu cəlb edilib: sloveniyalı Kristian Çuyek və italiyalı Rodolfo Furtino. Onlar komanda ilə birgə məşq edir. Vaxtımız çox deyil. Ancaq biz elə etməyə çalışacağıq ki, onlar bacardıqca tez uyğunlaşsın. Onlarla biz güclənəcəyik”.
Alesionun sözlərinə görə, qarşıdakı yarımfinalda “Araz” ispanlara qarşı əvvəlki oyunların nəticələrini təkrarlamamalıdır: “Əminəm ki, “Barselona” bizimlə düşməyinə şaddır. Buna qədər onlara qarşı üç dəfə oynamışıq və iki dəfə məğlub olub bir dəfə heç-heçə etmişik. Bu dəfə onlar qələbə qazanmamalıdır”.
