10 fevral 2014 00:55
Zaur Ramazanov: Böyük oyunun nəticəsi daha çox digər komandaların işinə yaradı
Veteran futbolçu Zaur Ramazanov azerisport.az saytına açıqlamasında “Xəzər Lənkəran” - “Neftçi” görüşünün nəticəsinin daha çox digər komandaların işinə yaradığını söyləyib:
"İlk qolu “Xəzər Lənkəran” heç nədən buraxdı. Komanda ikinci hissənin son dəqiqələrində özünə gəldi. Son 10-15 dəqiqəni yaxşı oynadı və layiqli olaraq iki qol vurdu. Cənublular ilk dəqiqələrdən belə oynasaydı, oyun başqa tərzdə başa çatardı. “Xəzər Lənkəran”ın müdafiədə çoxlu sayda səhvə yol verməsi, komandanı narahat etməlidir. “Xəzər Lənkəran”ın son dəqiqələrdə iki qol vurması yaxşı haldır. Bu oyunun nəticəsindən daha çox digər klublar qazandı. İlk altılıqda olan komandalarla liderlər arasında xal fərqi azaldı. Oyunda göstərilən qırmızı vərəqələrə gəldikdə, Ağabalanın cəzalandırılması anlaşılmazlıq kimi oldu. Matçdan sonra qardaşımla danışdım. Özü də dedi ki, “Neftçi”nin 16 nömrəsi əli ilə onu yumruqla vurub. Ardınca “Neftçi”nin başqa futbolçusu Rahid Əmirquliyevi vurub. Ağabalanın dediyinə görə, bu epizodları hakim Rəhim Həsənov görüb və ona görə də dərhal onlara qırmızı vərəqə göstərdi. Ağabalanın qırmızı vərəqəsinin ləğv olunacağına inanıram".
