Mindauqas Kalonas: Pantiç, kişi ol...

İcarə əsasında mövsümün sonuna qədər “Simurq”a keçmiş “Bakı”nın yarımmüdafiəçisi Mindauqas Kalonas azerisport.az saytına açıqlamasında TPL-in 20-ci turu çərçivəsində keçiriləcək oyunda sabiq komandasına qarşı oynamaq istəyindən danışıb:

“Hələlik oynayıb-oynamayacağım məlum deyil. Müqavilədə belə bənd yoxdur. Ancaq klublar hələ öz aralarında qərara gəlməyiblər. Ancaq çox güman ki, hər şey mənim xeyrimə həll olmayacaq. Çünki xidmətlərimdən imtina etmiş məşqçi mənim oynamamağım üçün hər şey edir”, deyə Kalonas sözə başlayıb.

“Başa düşmürəm ki, oyunçudan imtina edib sonra da onun oynamaması üçün necə hər şeyə əl atmaq olar? Yəqin o, nəticəyə görə çox həyəcan keçirir. Buna görə də mənim oynamağımı istəmir. Qoy Pantiç kişi olsun və mənə oynamaq imkanı versin”, deyə litvalı futbolçu öz sabiq məşqçisinə çağırış ünvanlayıb.

Xatırladaq ki, Kalonas “Bakı”ya mövsümün əvvəlində keçib. Ancaq sonra klub rəhbərliyi tərəfindən transferə çıxarılıb.

“Mən bu oyunda oynamaq və “Simurq”a “Bakı”nı yenməyə kömək etmək istəyirəm. “Bakı”nın heyətində 7 qol vurmuşam. İndi “Simurq”un çempionatda uğurlu çıxışı üçün bu qolların sayını artırmaq istəyirəm”, deyə Kalonas elan edib.