Eduardo: Bizim qrupdan birinci olaraq çıxmağımız arzuolunandır

Futzal üzrə millimizin oyunçusu Eduardo azerisport.az saytına müsahibəsində AÇ-də İtaliya yığmasına qarşı keçiriləcək oyun haqda danışmaqla yanaşı, Sloveniya millisinə qarşı keçirilmiş oyunu (7:6) xatırlayıb:

- Sloveniya millisinə qarşı keçirilmiş oyundan sonra özünüzə gəlmisiniz?
- Nə qədər çətin olsa da, biz artıq İtaliya yığmasına qarşı oyuna köklənirik. Hissləri bir kənara atmışıq. Vacib oyun ərəfəsində hisslər gərək deyil. Sizə deyim ki, hesab 2:5 Sloveniya millisinin xeyrinə olarkən belə, inanırdım ki, qalib gələ biləcəyik. Buna şübhə etmirdim. Biz yaxşı toplanış keçmişdik və hər şeyə hazır idik.

- İtaliya yığmasının istirahətə iki gün çox vaxtı olacaq. Bu, komandanın oyununda əksini tapa bilər?
- Yorğunluqdan əlavə, meydanda çoxlu əsəb qoyduq. Ancaq ümid edirəm ki, bu, həlledici amil olmayacaq.

- Qələbəyə rəğmən, yumşaq desək, komanda heç də ən yaxşı oyununu göstərmədi. İtaliya yığmasına qarşı oyundan nə gözləyək?
- Həqiqətən, biz çoxlu səhvlər buraxdıq. Tez-tez top itirirdik. Biz daha yaxşı oynamalıyıq. Belə oyunla uğura nail olmaq çətin olacaq. Ancaq nail olmağa borcluyuq.  Sloveniya yığması ilə belə bir trillerdən sonra bizim məğlub olmağa haqqımız yoxdur. Baxmayaraq ki, rəqib səviyyəcə daha yüksək olacaq və belə səhvləri bağışlamayacaq. Bizim qrupdan birinci olaraq çıxmağımız arzuolunandır.

- Bu qarşılaşma ərəfəsində Azərbaycan yığması qrupda birinci pillədədir. Komandanı hətta bir top fərqli məğlubiyyət də qane edir.
- Biz öz taleyimizi özümüz həll edəcəyik və top fərqi haqda düşünməyəcəyik. Bizim potensialımız var. Bu, bizə hətta İtaliya kimi güclü komanda üzərində qələbəyə ümid etməyə imkan verir.