Futzal yığmamız qrupdan çıxmaq şanslarını yüksəltdi

Futzal üzrə Avropa çempionatının İtaliya yığmasına qarşı keçiriləcək yekun oyunu ərəfəsində millimiz “C” qrupunda liderliyi ələ keçirib. Azerisport.az xəbər verir ki, Sloveniya millisi üzərində 7:6 hesabı ilə qazanılmış əzmkar qələbə, Joze Alesionun yetirmələrinə ilk turda İtaliya yığmasını 3:2 hesabı ilə məğlub etmiş (3:2) Balkan təmsilçisini qabaqlamaq imkanı verib.

Beləliklə də 7-6 top fərqi ilə yığmamızın 3 xalı var. Sloveniya millisi 9-9 top fərqi ilə 3 xalla yığmamızı təqib edir və taleyin hökmünü gözləyir. Apennin təmsilçisi İtaliya isə 2-3 top fərqi ilə xalsızlığa rəğmən, öz taleyinin ağasıdır.

Bu isə o deməkdir ki, hər şey son oyunda həllini tapacaq. Yığmamız İtaliya komandası ilə heç-heçə edəcəyi və ya qələbə qazanacağı təqdirdə, qrup birincisi olacaq. Həmçinin, 0:1 və 1:2 hesablı məğlubiyyətdən başqa, istənilən bir top fərqli məğlubiyyət də yığmamızı birinci pillədə saxlayacaq. İki və daha artıq top fərqli məğlubiyyət isə komandamızı qrup sonuncusuna çevirərək, dörddəbir finaldan kənar qoya bilər.

Azərbaycan və İtaliya yığmalarının dörddəbir finala çıxması üçün başqa bir variant da var. Bun üçün komandalar şəxsi oyunda İtaliya yığmasının xeyrinə 8:7 (və ya 9:8, 10:9, 11:10 və i.) hesablı qələbəyə oynamalıdır. Bu halda “skuadra adzurra” qrup ikincisi olacaq.

İtaliya yığmasının birinci, Azərbaycan yığmasını ikinci olması isə heç nəzəri cəhətdən də mümkün deyil. Çünki, bu halda top fərqi əsas götürülür.