Dieqo Madriqal: İnterə Parksın komandasına verdiyi xeyirdən çox faydalı olmağa çalışacağam
"İnter"in yeni transferi Dieqo Madriqal azerisport.az saytının suallarını cavablandırıb:
- "İnter"in heyətində Türkiyədə hazırlıqda iştirak etdin. Yeni komandan necə təsir bağışladı?
- İlk günlər mənim üçün çətin oldu. Çünki, uyğunlaşmaq lazım idi. Lakin qısa zamanda həm futbolçular, həm məşqçi heyəti ilə tanış oldum. Sevinirəm ki, belə mehriban komandanın üzvüyəm. Türkiyədə hazırlıq çərçivəsində vacib oyunlar keçirdik. Bu oyunlar mənim üçün kollektivə uyğunlaşmaq baxımından vacib idi. Şübhəsiz bəzi çatışmazlıqlar olur. Müəyyən vaxtdan sonra özümü daha yaxşı göstərə biləcəyəm.
- Azərbaycan futbolu haqda hansı məlumatın var?
- Menecerim "İnter"in təklifi barədə deyəndə məlumatsız idim. İnternet vasitəsilə klub və ölkəniz barədə məlumat topladım. Azərbaycanda futbola böyük diqqət göstərildiyini öyrəndim. "İnter" əvvəllər Azərbaycan çempionu olub. Ona görə bu komandaya gəlişimə razılaşdım. Həm də uğurlu çıxış etməklə avrokuboklara vəsiqə qazana bilərik. Vətənimlə Azərbaycan arasında məsafə uzaq olsa da bu mənim üçün problem deyil.
- Azərbaycan çemionatında "İnter" 4-cü yerdədir...
- Liderlərdən çox uzaqda deyilik. Bir neçə görüşdə qələbə qazansaq problem həll olunacaq. Çempionatın yarısı hələ irəlidədir. Ona görə indidən "İnter"i hesabdan silməyin. Türkiyədəki hazırlıq bəhrəsini verməlidir. Komandamla uğur qazanmaq, mövsümü mükafatla başa vurmaq istəyirəm.
- Ölkəmizə gəldiyin üçün Kosta-Rika yığmasına çağrılmağın problem ola bilər?
- Düşünmürəm problem olsun. Legioner həyatı yaşamaq hər futbolçuya nəsib olmur. "İnter"də özümü doğrultsam yenidən yığma məşqçilərinin diqqətini cəlb edəcəyəm. Azərbaycana gəlməyimi geriyə addım saymıram. İddialı komandanın üzvüyəm, digər tərəfdən özümü sınamaq istəyirəm.
- Yaxın keçmişdə Kosta-Rika yığmasının üzvü Uinston Parks Azərbaycanda iki klubun şərəfini qoruyub. İlk illərdə yaxşı oyun nümayiş etdirib...
- Parks yığmada böyük təcrübəyə malik futbolçudur. Onun Azərbaycanda oynadığını bilirəm. O, hər zaman komandasının uğurları üçün çalışır. Mənim də vəzifəm bu olacaq. "İnter"ə Parksın komandasına verdiyi xeyirdən çox faydalı olmağa çalışacağam.
- "İnter" çoxlu qol vəziyyəti yaratsa da imkanları istifadə edə bilmir. Bu problemi həll edə biləcəksiniz?
- Qolsuz qalib gəlmək olmaz. Komandamda təzə olduğuma baxmayaraq qələbə üçün əlimdən gələni edəcəyəm. Antalyadakı oyunlarda pis təsir bağışlamadıq. Mövsümü uğurla başa vura bilərik. Hələlik rəqiblər barədə heç bir söz deyə bilmərəm. Çünki, çempionatın səviyyəsi eləcə də klublarınız barədə məlumatım azdır. Çempionatın səviyyəsi oyunlar zamanı məlum olacaq.
