Maşado Nilson: İtalyan və sloveniyalılara yaxşı bələdik, nəinki onlar bizə
Futzal millimizin oyunçusu Maşado Nilson azerisport.az saytına müsahibəsində Belçikada keçirilən AÇ-yə hazırlıq və yarışda məqsədlər barədə danışıb:
- Komanda tarixində üçüncü AÇ-yə hazırdır?
- Düşünürəm ki, hazırdır. Bu komanda yarışda uğurla çıxış edəcək.
- Belə əminlik haradandır?
- Mən komandaya inanıram və həmişə inanmışam (gülür). Komandanın yarışda uğurlu çıxışına böyük ümidlərim var. Dəyişikliklərə gəlincə, ötən il ilə müqayisədə elə də çox deyil. Biz gücümüzə daha da əmin olmuşuq. Bu, az əhəmiyyət kəsb etmir.
- İki il qabaqkı AÇ ilə müqayisədə biz güclənmişik?
- Birmənalı cavab verə bilmərəm. İki il qabaq bizim güclü komandamız vardı. Elə indiki kimi. Sadəcə, bəxtimiz gətirmədi. Biz qrupdan çıxa bilərdik. O zaman bunu edə bilmədik. Bu dəfə isə hər eşy fərqli olacaq.
- Azarkeşlər nəyə gözləsinlər?
- AÇ-2010-dan pis çıxış etmək istəməzdik. Dörd il qabaq yarımfinala çıxa bilmişdik. Niyə bunu təkrarlamayaq? Bütün komanda bunu istəyir.
- Azərbaycan yığması İtaliya və Sloveniya yığmalarının qarşılaşmasından sonra yarışa başlayacaq. Bu, nə dərəcədə sərfəlidir?
- Bu, istifadə edə biləcəyimiz qədər sərfəlidir. Biz Sloveniya - İtaliya oyununa baxmışıq. Onlara yaxşı bələdik, nəinki onlar bizə.
- Qrupda hansı yerə ümid edirsiniz?
- Təbii ki, birinci yer uğrunda mübarizə aparacağıq. Heç kim dörddəbir finalda İspaniya ilə qarşılaşmaq istəmir. Birinci yer uğrunda ciddi mübarizə gedəcək.
- Qrupdan çıxmaq şansı əldə etmək üçün, ilk növbədə Sloveniya yığmasını məğlub etmək lazımdır.
- Bu, asan rəqib deyil. İtaliya yığması üzərində qələbə buna sübutdur. Yoxlama oyunlarında Portuqaliyanı məğlub edib İspaniya ilə heç-heçə oynayıblar. Buna rəğmən, bizə ilk oyunumuzda qələbə gərəkdir.
