29 yanvar 2014 17:05
Kamran Ağayev Bakıda qala bilər
Futbol üzrə milli komandamızın qapıçısı Kamran Ağayev karyerasını "Bakı" klubunda davam etdirə bilər. Azerisport.az xəbər verir ki, "Bakı" klubu qapıçını transferə çıxarsa da, hələlik onunla maraqlanan klub yoxdur.
Komandanın vitse-prezidenti Yaşar Seyidovun sözlərinə görə qarşıdakı iki gün ərzində təklif olmasa Ağayev komandada qalacaq: "Transfer pəncərəsinin bağlanmasına iki gün qalıb. Bu müddətdə Ağayevlə bağlı rəsmi təklif olmasa "Bakı" klubu müqavilə şərtlərini yerinə yetirəcək. İndiyə qədər onunla bağlı heç bir klub maraqlanmayıb. Ona görə qapıçıya heç bir transfer qiyməti qoyulmayıb. Ağayev karyerasını "Bakı"da davam etdirə bilər. Lakin əsas heyətdə oynayıb oynamayacağını baş məşqçi həll edəcək".
Qeyd edək ki, "Bakı" klubunun təlim-məşq toplanışında iştirak etməyən Kamran Ağayev fasilə zamanı məşqlərdən kənarda qalıb.
