28 yanvar 2014 00:33
Qış bazarının beş ən maraqlı transferi
TPL klubları qış bazarlığında fəal olmasalar da, bazarın bağlanmasına hələ vaxt var. Azerisport.az mövsümlərarası fasilədə gerçəkləşmiş ən maraqlı transfer “xəmsə”sini diqqətinizə çatdırır:
Elnur Allahverdiyev
Ünvan: “Xəzər Lənkəran”dan “Qəbələ”yə
Ünvan: “Xəzər Lənkəran”dan “Qəbələ”yə
Allahverdiyev mövsümü “Xəzər Lənkəran”da başladı, ancaq Toşakla münasibətləri alınmadı. Elə bu əsnada “gəmiqayıranlar”a “radarlar” müraciət etdi. Syominin cinahları qüvvətləndirmək istəyinə Allahverdiyev uyğun gəlmişdi. Beləliklə, millinin müdafiəcisi oyun təcrübəsini itirmədi və Syominlə anlaşma bir sözə bənddir. İcarə ilin axırında başa çatdı. Tərəflər stol arxasına keçib razılığa gəldilər və Elnur Allahverdiyev cənubdan şimala üz tutdu. Maraqlıdır ki, Allahverdiyevin özü “radarlar”ın düşərgəsinə azad agent kimi gəldiyini etiraf edib və cənublulara heç bir bağlantısının olmadığını dilə gətirib. Daha bir maraqlı məqam isə, “Xəzər Lənkəran”ın yeni baş məşqçisi Mustafa Dənizlinin Alahverdiyevi öz komandasında görmək istəyidir. Ancaq futbolçu çempionluq uğrunda real mübarizəni avrokuboklar yolunda nəzəri çarpışmadan üstün tutdu.
Rəşad Abdullayev
Ünvan: “Bakı”dan AZAL-a (“Rəvan”dan)
Ünvan: “Bakı”dan AZAL-a (“Rəvan”dan)
Yarımmüdafiəçi Rəşad Abdullayev üçün ötən il maraqlı alındı. Yayda “Qəbələ ”dən “Bakı”ya keçən futbolçu yeni baş məşqçi Milinko Pantiçin gəlişi ilə mütəxəssisin planlarına uyğun gəlmədi. İcarə əsasında “Rəvan” keçən Abdullayev 14 oyund meydana çıxaraq elə də uğurlu çıxışı ilə seçilməyən komandanın əsas ifaçısına çevrildi. İcarə müddətinin sonunda “Bakı”ya qayıtsa da, İspaniya toplanışına aparılmadı və AZAL-a satıldı. Natamam il ərzində dördüncü klub...
Samir Məsimov
Ünvan: “Lokomotiv”dən (Moskva) “Neftçi”yə
Ünvan: “Lokomotiv”dən (Moskva) “Neftçi”yə
İstedadlı hücumameylli yarımmüdafiəçi uğrunda mübarizəni “Flaqman” qazandı. Vaxtilə “Spartak”ın yeniyetmələrdən ibarət komandasında top qovmağa macal tapmış “Lokomotiv”in yetirməsi üçün “Neftçi” ilk peşəkar klub olacaq. Buna qədər Rusiyanın yeniyetmələr liqasında çıxışları ilə kifayətlənmiş 18 yaşlı Məsimov Kazan “Rubin”inin təklifində perspektiv görməyib “Neftçi”ni seçməklə qətiyyətini göstərmiş oldu.
Usim Nduka
Ünvan: “Tavşanlı Linyitspor”dan “Simurq”a
Bir illik fasilədən sonra millinin sabiq müdafiəçisi TPL-ə qayıdır. Azərbaycan pasportlu nigeriyalı Türkiyənin Birinci divizionunda özünü göstərə bilmədi. Artıq sabiq klubunun acınacaqlı vəziyyəti buna səbəbdir. Andrey Popoviçin də çıxış etdiyi və bu qış fasiləsində ayrıldığı “Tavşanlı Linyitspor” maliyyə cəbhəsində çətin dövrlər yaşayır. Xatırladaq ki, başına gələn macəralara qədər Nduka doqquz il AZAL-ın şərəfini qoruyub.
Orxan Əliyev
Ünvan: “Sumqayıt”dan “Xəzər Lənkəran”a
Ünvan: “Sumqayıt”dan “Xəzər Lənkəran”a
Gənclər yığmasının 18 yaşlı hücumçusu “Gənclər Şəhərin”də iki mövsüm keçirib. Bir vaxtlar onun “Portu”ya keçəcəyi barədə söz-söhbət dolaşırdı. Ancaq Əliyev geri qayıtdı və Mustafa Dənizlinin komandasında oynayacaq. Orxan Əliyev “kimyaçılar”ın heyətində 46 oyunda 10 dəfə fərqlənib. Əlbəttə, hücumçu üçün yüksək göstərici olmasa da, bu halda futbolçunun yaşını da əsas götürmək olar.
